Վարչապետ Կարեն Կարապետյանն իր առաջին ընդարձակ հարցազրույցն է տվել ԶԼՄ-ների ներկայացուցիչներին: Խոսեց բավականին գեղեցիկ, ապացուցեց, որ տեսախցիկների առաջ կանգնելու հարցում անգերազանցելի վարպետ է: Կարողացավ տպավորություն ստեղծել, որ իր համար բարդ բան չէ տեսակետ հայտնել ամենախրթին թեմաների մասին:
Բայց սա ընդամենը հեռուստատեսային էֆեկտն էր: Իրականության մեջ շատ բաներ այնքան էլ հարթ ու գունավոր չէին: Օրինակ, կոռուպցիայի հարցը: Վարչապետն ասում է, թե այդ չարիքի դեմ պատրաստվում է պայքարել այն գործիքակազմով, որն օրենքն ունի, որն օրենքը թելադրում է: «Օրենքով պայքարելու ենք կոռուպցիայի դեմ, հավասար դաշտ ստեղծելով՝ պայքարելու ենք մոնոպոլիայի դեմ: Հիմնականում ամենաշատ դժգոհություն առաջացնողը ընտանիքի մեջ, կամպանիայի մեջ, քաղաքում, փողոցում, երկրում՝ դա անարդարությունն է»,- ասում է վարչապետը: Ավելի ճիշտ, գրեթե ոչինչ էլ չի ասում, քանի որ այդ օրենքն իրենից առաջ էլ կար, կային նաև հազար ու մի հակակոռուպցիոն կառույցներ, կար հասարակության անսահման դժգոհությունը, բայց դա չօգնեց և չկա երաշխիք, որ կօգնի Կարապետյանի օրոք:
Իսկ նա դեռ շարունակում է. «Պետք է միջավայրը փոխենք, որպեսզի և որոշում կայացնելը դարձնենք ավելի թափանցիկ, հանրության համար հասկանալի, եթե փաստեր լինելու են՝ պետք է օգտագործել և կիրառել այն օրենքը, որ գոյություն ունի, որպեսզի դեմն առնենք»,- լավատես է վարչապետը: Բայց այս շատ լավատես վարչապետն ամենավերջում, լրագրողի ճշտող հարցին, թե` ամեն մարդ այսօր կարո՞ղ է ցանկացած ապրանք ներկրել, պատասխանում է. «Առանց որևէ պրոբլեմի: Երբ որ իմանաք, որ նման խոչընդոտ կա՝ անձամբ ինձ զանգահարում եք»:

Հաստատ զանգ կտան, հարգելի վարչապետ, եթե հսկա երկրում միակ ելքը մնացել է ձեզ զանգահարելը: Բայց նախ ձեր հեռախոսահամարն ասեք, հետո խոստացեք, որ անձամբ կպատասխանեք այդ զանգերին ու վերջում էլ վստահեցրեք, որ զանգից հետո նաև արդյունք կլինի:

shame.am