Շատ հազվադեպ է պատահում, որ մեր պատգամավորներն այսքան պունկտուալ լինեն և այսպես միաձայն կողմ քվեարկեն որևէ օրինագծի: Բայց այսօր, նույնիսկ այն դեպքում, երբ դեռ աշնանային նստաշրջանը չի էլ մեկնարկել, ԱԺ Արտաքին հարաբերությունների մշտական հանձնաժողովի անդամները միաձայն հաստատեցին «Հայաստանի Հանրապետության կառավարության և Չինաստանի Ժողովրդական Հանրապետության Մակաոյի հատուկ վարչական տարածքի վարչակարգի միջև մուտքի արտոնագրի պահանջը փոխադարձաբար վերացնելու մասին» համաձայնագիրը: 

 Պետք է մտածել, որ չինացիների հետ գործ ունենալու յուրաքանչյուր քայլ պիտի դրական գնահատվի՝ հաշվի առնելով այդ երկրի անսպառ հնարավորությունները և անընդգրկելի սպառման շուկայի ծավալները: Ու եթե կողմերը փոխադարձ համաձայնության են եկել մուտքի և ելքի ազատ ռեժիմի հարցում, ապա դա միայն ու միայն կնպաստի մեր գործարարների այցելությունների արդյունավետությանը: Մնում է միայն հասկանալ, թե ինչու է հատկապես ընտրվել Մակաոյի հատուկ վարչական տարածքը և ինչով է այդ վայրն առանձնահատուկ:

Ու հենց այստեղ էլ վրա է հասնում ամենահետաքրքիրը: Պարզվում է, որ Մակաոն աշխարհին առավելապես հայտնի է որպես խաղատների բիզնեսը զարգացած տարածք: Եվ միանգամից հասկանալի է դառնում, թե որտեղ էր թաքնված մեր պատգամավորների նախանձախնդիր վերաբերմունքի արմատը:

ԲՀԿ խմբակցության պատգամավոր Գուրգեն Արսենյանը նույնիսկ մի քիչ անկեղծացավ ու բացատրեց, թե փորձում են նաև Հայաստանի խաղամոլ բարեկամներին էլ ներքաշել: Իսկ թե ով ումից որքան կքաշի, դա արդեն ապագայի հարց է:

Կարևորն այն է, որ Հայաստանի խաղամոլները մոտիկից շփվեն չինացի խաղամոլների հետ, փորձի փոխանակման գնան և նոր ձեռքբերումներ ունենան այդ ոլորտում: Չէ՞ որ դա մեր երկրի առաջնահերթություններից մեկն է:

shame.am