Առավոտ վաղ, ամեն օրվա նման, հայտնվեցին հրապարակումներն այն մասին, թե ինչպիսին է եղել իրավիճակը սահմանին: Արդեն քանի օր հարաբերական անդորրը սահմանի երկայնքով ու նաև հակառակորդի հանգստությունը մնացել էր անփոփոխ այսօր էլ: Առավոտյան մեր կայքի հայտնած տեղեկատվությունն այն մասին, որ ծեծի արդյունքում սպանվել է հայտնի լեզվաբան, ԵՊՀ դասախոս, հայոց լեզվի թեստերի հեղինակ Փառանձեմ Մեյթիխանյանի ամուսինը՝ 58-ամյա Եղիշե Խաչատրյանը, արագորեն տարածվեց գրեթե բոլոր լրատվական կայքերում, ֆեյսբուքյան խմբերում ու առանձին հրապարակումներում: Դեպքը տեղի էր ունեցել հունիսի 4-ի երեկոյան, աշխատասեր ու համեստ մարդուն սպանել էին մի քանի հոգով ծեծի ենթարկելով, մահացել էր գլխին հասցված հարվածներից:

Այս տեղեկատվությանը զուգահեռ, համացանցում դեռ պահպանվում էին գեներալ Մանվել Գրիգորյանի վարորդի սպանության մասին հրապարակումներն ու դեպքի ճշտված ու չճշտված մանրամասները: Քննարկվում է նաև վարկած՝ ինքնասպանության մասին:

Օրվա ամենից քննարկված ու մեկնաբանված հրապարակումներից մեկը հաղորդավարուհի Զառա Արամյանի հոսպիտալացման մասին էր: Տեղեկությունները, որ Զառան սրտի հետ կապված խնդիրներ ունի և ենթարկվելու է վիրահատության, ավելի ուշ հերքել էին Նորքի սրտաբանական հիվանդանոցից ու պարզաբանել, որ հաղորդավարուհին պարզապես սրտի շրջանում որոշակի ցավեր է ունեցել և անցել համապատասխան հետազոտություններ: Բարեբախտաբար, սրտի խնդիրներ ունենալու և վիրահատության շուրջ բոլոր կասկածները, հետազոտությունների արդյունքում, հերքվել են: Այս ամենի կողքին, օրը ֆեյսբուքում առավել հագեցած էր աստղային լուսանկարների ու սելֆիների բազմազանությամբ ու առատությամբ:

Նոր լուսանկար էր հրապարակել դերասանուհի Անաիս Սարդարյանը՝ պարզ զգեստով ու վառ շրթներկով, դերասանուհի Մերի Հակոբյանը՝ Վրաստանում անցկացվող իր հանգստից, իրենց սելֆին էին ներկայացրել նաև երգիչներ Լիլիթ Հովհաննիսյանը, Արման Հովհաննիսյանն ու Սուպեր Սաքոն, համատեղ լուսանկարն արված էր ԱՄՆ-ում, նոր լուսանկար ուներ նաև դերասանուհի Մարիամ Մելիքյանը՝ նրբագեղ զգեստով, նաև երգիչ Միշոյի կինը՝ ամերիկյան շոուների կազմակերպիչ Սոնա Հովհաննիսյանը՝ Տավուշի մարզում անցկացրած հանգստից:

Ուշագրավ էր նաև մերկապարուհի, մերկապարի աշխարհի չեմպիոն գեղեցկուհի Վարդայի հրապարակած տեսանյութը, որը մի դրվագ էր նրա ձողի վրա արվող անկրկնելի պարից:

Շուշաննա Գրիգորյան

hraparak.am