Իսկ վերահաս պատերազմն ու վտանգի չափերը առավել ևս են սրել նրա ինքնագնահատականի չափերը: «Եթե առաջին եռամսյակում մենք ունեինք նախորդ տարիների նկատմամբ 9 տոկոս աճ, ապրիլի ընթացքում որոշակի տեմպի նվազում ունեցանք, արդեն հիմա վերականգնվում է այդ տեմպը, և սա նույնպես ցույց է տալիս, որ ադրբեջանական ագրեսիան իր նպատակին չի հասել»,- այսօր զեկուցել է Արծվիկը, որպեսզի հետո արտասանի իր ամենաերազելի նախադասությունը. «Հայաստանի էկոնոմիկան պատրաստ է պատերազմի»:

Սա գրեթե պիտի հնչեր այսպես. «Արծվիկ Մինասյանի շնորհիվ էկոնոմիկան պատրաստ է պատերազմի»: Բայց քանի որ հայտնի դաշնակն աչքի է ընկնում աներևակայելի համեստությամբ, նա այդպես չի արտասանել՝ դա թողնելով, որ մենք կռահենք: Եվ քանի որ հեշտ կռահեցինք, այդ պատճառով էլ ուզում ենք մի քանի լրացուցիչ հարցել տալ «Հաղթանակի նախարարին»:

Էկոնոմիկան պատերազմին պատրաստ լինելու համար նախ պիտի պատրատ լիներ խաղաղության: Իսկ, որքան հայտնի է, մինչև երեկ պատկերը միանգամայն այլ էր: Ամեն օր ձեռնարկություններ էին փակվում, տնտեսական աճը ընդամենը թղթի վրա է, այն էլ միայն հանքարդյունաբերության ու էլեկտրաէներգիայի վաճառքի հաշվին, մնացածը վաղուց հոգիներն ավանդել են, կոռուպցիան խժռել է բոլոր ոլորտները, մենաշնորհները փակել են զարգացման ճանապարհը, հարկերը, մաքսային բեռը, համատարած թալանը բզկտել են էկոնոմիկայի մարմինը:

Օրերս նույնիսկ հայտնի դարձավ, որ տուրիստական գործակալություններին տրված պատվերները չեղարկվում են, զբոսաշրջիկների խոշոր խմբերն այս օրերին հրաժարվել են այցելել Հայաստան, որովհետև այստեղ պայթյունավտանգ իրավիճակ է: Եվ այս բոլորն իմանալու հետ մեկտեղ Արծվիկը դեռ ասում է. «Հայաստանի էկոնոմիկան պատրաստ է պատերազմի»:

Հիմա արդեն լուրջ տարակուսանք կա: Տեսնես ի՞նչ պատերազմի մասին է խոսում դաշնակ նախարարը: Քանի որ մեր իմացած պատերազմի համար մի քիչ ավելին է պետք, քան Արծվիկի ղեկավարած էկոնոմիկան է:

shame.am