Հայ-ադրբեջանական սահմանագծում տեղի ունեցող ռազմական իրադրությունն այս օրերին հայ քաղաքական գործիչներից շատերին տարել է Լեռնային Ղարաբաղ: Առաջինը լսեցինք ԱԺ ՀՀԿ-ական պատգամավոր Մանվել Գրիգորյանի անունը, ով նախագահում է Երկրապահ կամավորների միությունը: Արցախում Մանվել Գրիգորյանը գտնվում է իր բազմահազարանոց ԵԿՄ անդամների հետ:

Քաղաքացիական պայմանագիր կուսակցության հիմնադիր, ԱԺ ՀԱԿ խմբակցության պատգամավոր Նիկոլ Փաշինյանն էլ արդեն հասցրել է Ստեփանակերտում հանդիպում ունենալ ԼՂՀ նախագահ Բակո Սահակյանի հետ. «ԼՂՀ նախագահը ներկայացրեց Ղարաբաղ-Ադրբեջան շփման գծի երկայնքով ստեղծված վիճակի եւ հնարավոր զարգացումների վերաբերյալ իր գնահատականները: Մենք վերահաստատեցինք մեր անվերապահ աջակցությունը ԼՂՀ քաղաքական ղեկավարությանը, ինչպես նաեւ Հայաստանի եւ Լեռնային Ղարաբաղի Զինված ուժերին եւ պատրաստակամություն հայտնեցինք մեզ հասու միջոցներով աջակցել նրանց».- իր ֆեյսբուքյան էջում գրել է Նիկոլ Փաշինյանը»:

Ադրբեջանի սանձարձակ գործողությունների պատճառով ոտքի է ելել նաև ՀՀԿ-ական պատգամավոր Առաքել Մովսիսյանը, որոշ տեղեկությունների համաձայն` նա իր ջոկատով մեկնել է Քարվաճառ:

ԲՀԿ-ական պատգամավոր Ռուբեն Գեւորգյանն իր Երդվյալ ազատամարտիկների միության հրամանատարական կազմի 16 անդամների հետ նույնպես Արցախում է, ԵԱՄ-ի մյուս անդամները Երևանում կազմուպատրաստ սպասում են նախարարի հրմանանին:

ԱԺ ՀԱԿ խմբակցության ղեկավար Լեւոն Զուրաբյանն էլ հայտարարել է, որ Ազգային ժողովում քննարկվում է բոլոր խմբակցությունների պատգամավորների համատեղ այցը Լեռնային Ղարաբաղ:

Տեղեկացանք, որ Սյունիքի մարզպետ Սուրիկ Խաչատրյանը` իր օգնական Զարզանդ Նիկողոսյանի եւ մի շարք այլ սյունեցիների հետ համալրել է առաջնագիծ գնացողների շարքերը: 

Հրազդանի քաղաքապետ Արամ Դանիելյանը, ի դեպ, նույնպես ԵԿՄ անդամ  է, վերջինս Երկրապահ կամավորականների միության Հրազդանի բաժանմունքի ներկայացուցիչների հետ նույնպես Արցախում է: Արցախից երեկ է վերադարձել ազատամարտիկ Սասուն Միքայելյանը, ով Հրազդանի քաղաքապետի ընտրություններում իր թեկնածությունն է առաջադրել: Սասուն Միքայելյանը կամավորների ջոկատ է հավաքագրել  և սպասում է պաշտպանության նախարարի հրամանին: Ի դեպ, Հրազդանի քաղաքապետի թեկնածուները ստեղծված իրավիճակի պատճառով դադարեցրել են քարոզարշավը:

«Նոր Հայաստան» հանրային փրկության ճակատի ղեկավար, Արցախյան հերոսամարտի մասնակից Ժիրայր Սեֆիլյանը կոչ է արել ազատամարտիկներին ու երիտասարդությանը պատրաստ լինել առաջին իսկ անհրաժեշտության դեպքում կանգնելու Հայրենիքի պաշտպանության շարքերում:

Արցախին օգնության են շտապել նաև  Արցախի առողջապահության նախկին նախարար Հարություն Քուշկյանը և «Էրեբունի» բժշկական կենտրոնի գործադիր տնօրեն Միքայել Մանուկյանը:

Մեր տեղեկություններով` այս օրերին Արցախում է գտնվում նաև գլխավոր դատախազ Գևորգ Կոստանյանը: Վերջինս դատախազության մի շարք աշխատակիցների հետ շտապել է իրավական օգնություն ցուցաբերել երկրորդ հայկական պետությանը: Տեղի ունեցած վայրագությունների դեպքերով ԼՂՀ Դատախազությունում գործեր պետք է հարուցվեն:

ՀՀ մարդու իրավունքների պաշտպան Արման Թաթոյանն էլ իրավապաշտպաններ Արտակ Զեյնալյանի եւ Արա Ղազարյանի հետ աշխատանքային հատուկ այցով մեկնել է Լեռնային Ղարաբաղի Հանրապետություն:

Նյութի աղբյուրը `hraparak.am