Այսօր դաշնակցական լրատվամիջոցներն իրենց օրը սկսել են գլխավոր իրադարձության լուսաբանմամբ: Կայքերում անմիջապես աչքի է զարնում խոշոր գլխատառերով վերնագիրը. «Արծվիկ Մինասյանը մթնոլորտ է փոխել կառավարությունում»: ՀՅԴ-ի կողմից նման ուշադրության, հավանաբար, մեկ էլ կարող էր արժանանալ տեղեկությունն այն մասին, որ Ստամբուլն արյան ծով է դարձել: Բայց քանի դեռ Ստամբուլում արշալույսները խաղաղ են, ապա դաշնակ Արծվիկը մնում է օրվա հերոսը՝ իր հերոսական վարքով:

Իսկ ի՞նչ է արել Էկոնոմիկայի նորանշանակ նախարարը: Գրեթե անհավանական մի բան: Երբ այսօր կառավարության նիստում ֆինանսների նախարար Գագիկ Խաչատրյանը ներկայացրել է ԱԺ պատգամավոր Միքայել Մելքում­յանի՝ օրենս­դրական նա­խաձեռնության կար­գով ներկա­յաց­ված` «Եկամ­տա­յին հարկի մասին» օրենքում լրա­ցում կատարելու մասին» հարցի վերաբերյալ կառավարության եզրակացությունը, վարչապետ Հովիկ Աբրահամյանը հարցրել է. «Հարցեր կա՞ն»: Ու հենց այստեղ էլ Արծվիկ Մինասյանն արձագանքել է` ասելով, որ էկոնոմիկայի նախարարությունն այդ նախագծի վերաբերյալ ունեցել է տրամագծորեն հակառակ տեսակետ: Այսքան բան:

Իսկ թե հետո ինչպես մթնոլորտը միանգամից փոխվեց, ինչպես ներկաները սկսեցին օդի այլ բաղադրություն շնչել, ինչպես ամպերը երկնքում ետ քաշվեցին ու վերևում շողշողաց դաշնակցական արևը, այս բոլորը հանձնում ենք ձեր վառ երևակայությանը: Իսկ դաշնակցական մամուլին էլ թողնում ենք իր ունեցած երևակայության չափով պնդել, թե իբր «մինչ այս կառավարության նիստում սովորաբար որոշումների ընդունումից առաջ առարկություններ չէին հնչում»:

ՀՅԴ-ի գործադրած ջանքերը՝ ցուցադրելու, թե իբր իրենց գալով մոլորակը սկսել է ավելի արագ պտտվել և Հայոց աշխարհը թևակոխել է իր Ոսկեդարը, առայժմ ուղեկցվում են միայն էժանագին գովազդներով և անհեթեթ ուռճացումներով: Իսկ նման նախաբանը հետզհետե դառնում է ապացույցն այն բանի, որ ապագայում ևս սրանցից որևէ լուրջ բան ակնկալել չի կարելի:

shame.am