Փարիզում Ֆրանսիայի և Հայաստանի նախագահների հանդիպումը նորացրեց երկու երկրների միջև եղած տնտեսական, մշակութային կապերը․ Tert.am-ի հետ զրույցում ամփոփելով Սերժ Սարգսյանի և Ֆրանսուա Օլանդի հանդիպումը՝ ասաց Ֆրանսիայում հայկական ընկերությունները համակարգող խորհրդի նախագահ Մուրադ Փափազյանը:
«Ֆրանսիայի հայ համայնքը, մենք, շատ լավ կապեր ունենք Հայաստանի կառավարության հետ, և մեր ներդրումով Հայաստանի հետ Ֆրանսիայի կապերը կլավանան»,- ասաց նա:
Խոսելով Հայաստանի նախագահի՝ ֆրանսիական ընկերություններին արված՝ Հայաստանում ներդրումներ անելու կոչի մասին՝ Մուրադ Փափազյանը նշեց, որ եթե Հայաստանում ներդրումային դաշտը բարելավեն, այս ոլորտում իրավական դաշտը կարգավորեն, շատ ֆրանսահայեր ևս կցանկանան ներդրումներ անել Հայաստանում:
«Պետք է իրավական հիմքի վրա դրվի, որպեսզի նաև ֆրանսահայ գործարարները ցանկանան Հայաստանում ներդրումներ անել,- ասաց նա՝ նկատելով, որ հիմա հայաստանյան իշխանությունները այս առումով «լավ ճանապարհի» վրա են, զարգացումներ կան,- բայց պետք է շարունակեն շահել ընկերությունների վստահությունը»:
Ֆրանսիայի և Հայաստանի նախագահների հանդիպմանը քննարկվեց նաև արցախյան հակամարտությանը վերաբերող հարցեր: Այս մասին խոսելիս Մուրադ Փափազյանը նշեց, որ հստակ է Ֆրանսուա Օլանդի դիրքորոշումը՝ Մադրիդյան սկզբունքները պետք է հարգվեն:
«Ինքը ցանկություն է հայտնել, որ հասնենք Արցախի ինքնորոշման հանրաքվեին: Այնուհետև Արցախի շուրջ եղած հինգ տարածքներն Ադրբեջանին հանձնելուն, ոչ թե յոթ, այլ հինգ: Սա Օլանդի ծրագիրն է, նա դա է առաջարկում բանակցող կողմերին, բայց թե դա ընդունելի՞ է, միայն Արցախի ժողովուրդը կարող է որոշել, սա մենք չենք կարող որոշել: Դրա համար ենք մենք պնդում, որ Արցախի իշխանությունները պետք է բանակցությունների մաս կազմեն»,- ասաց նա:
Նա մատնանշեց, որ Արցախի ժողովուրդն ինքնորոշվել է, սակայն միջազգային հանրությունը հանրաքվեն չի վերահսկել և չի ճանաչել: «Հիմա երբ կա առաջարկ հանրաքվեն անցկացնելու, արդեն լավ է»,- ասաց նա՝ շեշտելով, որ ամեն դեպքում, եթե Ֆրանսուա Օլանդը կամ ուրիշ մեկն ինչ-որ բան առաջարկի, պետք է նախ և առաջ Արցախի ժողովուրդն ընդունի:
Մուրադ Փափազյանն անդրադարձավ Մարտի 14-ին Ադրբեջանի նախագահի՝ Ֆրանսիա այցին: Համաձայնեց, որ պատահական չէ, որ Հայաստանի նախագահի այցից հետո Ադրբեջանի նախագահն է այցելում Փարիզ: «Ադրբեջանի նախագահը նաև Արցախյան հակամարտությանը վերաբերող օրակարգով է գալու Ֆրանսիա: Ֆրանսիան ցանկանում է իր դերը խաղալ, իսկ դրա համար պետք է երկու երկրների ղեկավարների հետ էլ բանակցություններ ունենա, և նաև, նույնիսկ եթե անգամ մենք մի քիչ նեղված ենք այդ իրականությամբ, պետք է հարգենք Ֆրանսիայի որոշումը»,- ասաց նա:
Փափազյանն ասաց, որ համայնքը մտադիր է Ադրբեջանի նախագահի այցը դատապարտող բողոքի ակցիա անցկացնել ֆրանսիական մի շարք քաղաքներում:
«Օլանդն իր նախագահության ժամկետը մայիսին կավարտի: Իր խնդիրն է, որ նաև Արցախյան հակամարտության լուծումը գտնվի»,- նշեց Մուրադ Փափազյանը:
Նա նաև կարևորեց Ֆրանսուա Օլանդի խոսքը, որ պետք է պատժվի հարձակվող կողմը: «Ինքը կողմ է, որ սահմանին վերահսկողական մեխանիզմները լինեն, որ իմանան, թե ով խախտեց հրադադարի ռեժիմը»,- ասաց նա:
Դիտարկմանը, թե Ֆրանսուա Օլանդը հեռացող նախագահ է, եթե նա ավարտին չհասցնի իր սկսածը, ո՞վ է ավարտելու, Մուրադ Փափազյանը պատասխանեց․ «Սա մեծ գործ է, պետք է մենք շարունակենք գործի շարունակականությունը: Մենք պետք է աշխատանք տանենք, որ առաջիկա նախագահը շարունակի Ֆրանսուա Օլանդի պրո-հայկական քաղաքականությունը»:
Հռիփսիմե Հովհաննիսյան

tert.am