ԱՄՆ-ի Հանրապետական կուսակցությունից երկրի նախագահի թեկնածության համար պայքարող հավակնորդների 6-րդ բանավեճն անցկացվեց Հարավային Քարոլինա նահանգում։ Բանավեճն ավելի սուր էր, քան ենթադրվում էր նախապես։

Ֆլորիդայի նախկին նահանգապետ Ջեբ Բուշը քննադատում էր Հանրապետական կուսակցությունից դեռեւս առաջին հորիզոնականը զբաղեցնող Դոնալդ Թրամփին՝ ոչ ամերիկացի մահմեդականներին Միացյալ Նահանգներ մուտք գործելու հնարավորությունից զրկելու առաջարկի համար։
՝՝Կարծում եմ, դուք կվերանայեք ձեր այս դիրքորոշումը, քանի որ նման քաղաքականությամբ անհնար է կառուցել այնպիսի մի դաշինք, որը լուրջ պայքար ծավալեր ընդդեմ ՝՝Իսլամական պետություն՛՛ խմբավորման՛՛, հայտարարեց Բուշը։

Դոնալդ Թրամփը հակադարձում էր, ասելով, թե իր համար առաջնայինը երկրի անվտանգությունն է։

Թրամփի հետ այսպես ասած, մարտի բռնվեց նաեւ Թեքսասի նահանգապետ Թեդ Քրուզը։ Հիմնական թեման Թրամփի այն հայտարարությունն էր, թե Կանադայում ծնված լինելու հանգամանքը կարող է հարցականի տակ դնել նախագահ ընտրվելու Քրուզի իրավունքը։

Թրամփը հայտարարում էր. ՝՝Ես արդեն գիտեմ, որ դեմոկրատները պատրաստվում են դատական գործ հարուցել այդ հարցով։ Ու որեւէ մեկը չի կարող ասել, որ թեկնածու դառնալու դեպքում, դու երբեւիցե կարող ես ստանձնել նախագահի պաշտոնը՛՛։

Քրուզի պատասխանն ավելի բացատրական էր ու հիմնավորված.
՝՝Ես հասկանում եմ՛՛, ասաց նա, ՝՝որ Դոնալդը ներկայումս շատ է մտահոգված իր աջակիցների թվի նվազման փաստով, սակայն պիտի ասեմ, որ ԱՄՆ-ի օրենքների համաձայն, արտասահմանում ծնված յուրաքանչյուր երեխա, ում ծնողներից գեթ մեկը ԱՄՆ-ի քաղաքացի է, ինքնաբերաբար համարվում է ԱՄՆ-ի քաղաքացի՛՛։

Ինչ վերաբերում է Ֆլորիդան ներկայացնող սենատոր Մարկո Ռուբիոյի ու Նյու Ջերզիի նահանգապետ Քրիս Քրիսթիի միջեւ բանավեճին, ապա պետք է ասել, որ նրանք պայքարում էին ցույց տալու համար, թե իրենցից ով է ավելի շատ պահպանողական։

՝՝Ես սիրում եմ Քրիս Քրիստիին, սակայն մենք չենք կարող թույլ տալ, որ երկրի նախագահ ընտրվի մեկը, որը կողմ է զենքի վաճառքի վրա սահմանափակումներ դնելուն՛՛, հայտարարեց Մարկո Ռուբիոն։

Քրիս Քրիսթին էլ իր հերթին է ՝՝սիրում՛՛ Մարկո Ռուբիոյին.

Նրա խոսքերով. ՝՝Ռուբիոն էր երկու տարի առաջ ինձ անվանում պահպանողական այնպիսի բարեփոխական, որի կարիքն ունի Նյու Ջերսին՛՛։

Կուսակից մրցակիցների միջեւ նման բախումները մտահոգում են նեյրովիրաբույժ Բեն Քարսոնին, որը հանդես է գալիս Հանրապետական կուսակցությունը միասնական պահելու կոչերով։ Հիշեցնենք, որ հանրապետական մրցակիցները նախազգուշացնում են միմյանց, թե չի կարելի թույլ տալ, որ դեմոկրատ Հիլարի Քլինթընը շարունակելու գա Օբամային։

Նման խոսքերով է հանդես գալիս նաեւ Քրիս Քրիսթին։
Իսկ Մարկո Ռուբիոյի խոսքերով, ՝՝Քլինթընն ավելին է, քան աղետը։ Նա արժանի չէ Միացյալ Նահանգների գլխավոր հրամանատարի դիրքին՛՛։
Հանրապետական կուսակցությունից հավակնորդներն այժմ սկսելու են նախընտրական արշավը Այովա ու Նյու Հեմփշիր նահանգներում, որտեղ մի քանի շաբաթից անցկացվելու է վաղաժամ քվեարկություն։