Նախկին վարչապետ, ՀՀԿ փոխնախագահ Հովիկ Աբրահամյանը հայտարարել է, որ դուրս է գալիս ՀՀԿ-ից: Թե ինչն է պատճառը, Հովիկ Աբրահամյանը առայժմ չի ասում, խոստանալով հայտարարել դա ավելի ուշ:
Ի պատասխան tert.am-ի հարցի, թե արդյոք միանալու է իր խնամի Գագիկ Ծառուկյանի «Ծառուկյան դաշինքին», Աբրահամյանը տվել է բացասական պատասխան, ասելով, թե հիմա չունի այդպիսի որոշում, բայց մնալու է եւ զբաղվելու է քաղաքականությամբ:
Նշանակու՞մ է դա արդյոք, որ Աբրահամյանը «Ծառուկյան դաշինքին» միանալու որոշում կկայացնի ավելի ուշ: Կամ, ավելի ուշ կհայտարարի այդ մասին:
Ի վերջո, դեռ պետք է մտածել բացատրությունը, ինչը հեշտ բան չէ:
Բանն այն է, որ Հովիկ Աբրահամյանի ՀՀԿ-ից դուրս գալը նրա տապալումն է, քանի որ նա ՀՀԿ-ից դուրս է գալիս այն բանից հետո, երբ կուսակցությունում եւ իշխանությունում անդառնալիորեն կորցրել է ազդեցությունը, երբ կորցրել է Սերժ Սարգսյանից հետո առաջին դեմքի կարգավիճակում հայտնվելու բոլոր հույսերը:
Հայտարարել, թե դուրս է գալիս դրա համար, այդքան էլ հեշտ չէ: Միաժամանակ հեշտ չէ հայտարարել, թե դուրս է գալիս ՀՀԿ-ից, որովհետեւ համաձայն չէ կուսակցության քաղաքականությանը, եւ այլն:Դա ծիծաղելի կլինի, թեեւ Հայաստանի ներքաղաքական կյանքում կլինի ոչ առաջին եւ ոչ էլ վերջին ծիծաղելիքը:Այդուհանդերձ, հստակ է, որ Աբրահամյանը պետք է գտնի բացատրություն՝ նախ ՀՀԿ-ից դուրս գալու, եւ հետո էլ որեւէ այլ նախընտրական ֆորմատի միանալու: Թեեւ լեզուն ոսկոր չունի, հատկապես Հայաստանի իշխանական եւ քաղաքական գործիչների լեզուն, այդուհանդերձ Հովիկ Աբրահամյանի համար չափազանց բարդ կլինի հիմնավորել ՀՀԿ-ից դուրս գալն ու այլ ուժի միանալը:
Թերեւս ավելի դյուրին կարող է լինել միայն դուրս գալը հիմնավորելը, ինչը չի ենթադրի ՀՀԿ քաղաքականությունից դժգոհության շոշափելի ծավալ եւ շեշտադրում:Բայց այդ դեպքում հարց կառաջանա, թե ինչպես է Հովիկ Աբրահամյանը մնալու քաղաքականության մեջ, եթե դուրս գալով ՀՀԿ-ից՝ չի միանում այլ ֆորմատի: Գուցե այդ ֆորմատը Ծառուկյան դաշինքը չէ, այլ ուրիշ միավոր: Բայց այլ միավորի հետ գործակցելու տարբերակն էլ ավելի մշուշոտ է:
Այդ պարագայում կարծես թե մնում է տեսանելի մի տարբերակ՝ քաղաքականության մեջ մնալու:
Եթե Հովիկ Աբրահամյանը չմիանա որեւէ այլ նախընտրական ֆորմատի, ապա քաղաքականության մեջ նա կարող է մնալ թերեւս նախագահի պաշտոնում՝ Հայաստանի հանրապետության նախագահի:
Ի դեպ, հետաքրքիր է, որ նոր Սահմանադրությամբ Հայաստանի նախագահը պետք է լինի անկուսակցական:

Նախագահին ընտրելու է խորհրդարանը:
ՀՀԿ-ից դուրս եկած եւ որեւէ կուսակցության չմիացած Հովիկ Աբրահամյանը կարող է դառնալ Հայաստանի չորրորդ նախագահի «բոլորի համար ընդունելի թեկնածու», եթե հաշվի առնենք այն, որ 2017 թվականի խորհրդարանն ըստ ամենայնի չի ունենա բացարձակ մեծամասնություն, եւ մեծամասնություն կկազմեն համակարգի տարբեր թեւերը:
Այդպիսով, մասամբ կիրականանա Հովիկ Աբրահամյանի երազանքը՝ դառնալ Հայաստանի հանրապետության չորրորդ նախագահը:
Մասամբ, որովհետեւ Աբրահամյանի երազանքը ենթադրում էր նախագահական կառավարում, որտեղ նախագահը կունենար իրական իշխանություն եւ չէր լինի խորհրդարանի նշանակած անձ:
Բայց, հաշվի առնելով նրա ներկայիս վիճակը, վերջին շրջանում քաղաքական կարիերայի սրընթաց անկումը, խորհրդարանական կառավարման մոդելում նշանակովի նախագահի պաշտոնը Հովիկ Աբրահամյանի համար կարող է դառնալ լավ մխիթարություն, գուցե ավելին, քան նա կարող էր ակնկալել:

lurer.orecor.ru