ՀՀ վարչապետ Կարեն Կարապետյանը հարցազրույց է տվել Financial Times-ի FDI MAGAZINE պարբերականին և անդրադարձել է իր գլխավորած կառավարության առաջնահերթություններին: Ի մասնավորի, վարչապետն ասել է. «Մեզ անհրաժեշտ է ստեղծել իսկապես ազատ, մրցակցային և արդար միջավայր բիզնեսի համար: Եթե հստակ ազդակներ ուղարկենք, օտարերկրյա ներդրողները նույնպես կարձագանքեն և մուտք կգործեն մեր շուկա, եթե վստահություն տածեն խաղի կանոնների հանդեպ»: Վարչապետը բացատրել է, որ օտարերկրյա ուղղակի ներդրումները հույժ կարևոր են մեզ համար՝ ոչ միայն տնտեսական աճին նպաստելու և լրացուցիչ ներդրումներ, այլև կառավարման նոր մշակույթ ներգրավելու տեսանկյունից, որի միջոցով նաև ցույց կտանք, որ մեր երկիրը բաց է, որը բազմապատկող դրական ազդեցություն կունենա մեր կյանքի այլ ոլորտների վրա:

Հասկանալի է, որ նման տպավորիչ նախաբանից հետո նույնիսկ օտար լրագրողին պիտի հետաքրքրեր, թե Կարեն Կարապետյանը հստակ ազդակներ ասելիս հատկապես ի՞նչ նկատի ունի, այսինքն ի՞նչ է խոստացվում օտար ներդրողներին, ո՞րն է այն հրապուրիչ խայծը, որ կարող է նրանց ուղղորդել դեպի Հայաստան: Եվ ահա այս պարզ հարցին վարչապետը տալիս է ցնցող պատասխան. «Պետականություն ունեցող ամենահին ազգերից մեկն ենք: Երևանը Հռոմից 50 տարով ավելի հին է: Երևանում շատ մոտ գտնվող Շենգավիթի տարածքը 6000 տարեկան է՝ քաղաքակրթություն, որը 1000 տարով ավելի հին է, քան եգիպտական բուրգերը: Մենք առաջին քրիստոնյա ազգն ենք: Տպագրություն նախաձեռնած առաջին պետությունների շարքում ենք եղել: Գործարարներին և զբոսաշրջիկներին առաջարկում ենք գալ Հայաստան, հյուրընկալվել մեզ մոտ և դառնալ մեր բարեկամը»:

Լավ է, որ Կարեն Կարապետյանը ծանոթ է իր հայրենիքի հազարամյա պատմությանն ու մշակույթին: Բայց արտասահմանի գործարար աշխարհի խոշոր խաղացողների ինչի՞ն է պետք բուրգերից հին հնավայրը, եթե նրանք այստեղ պիտի գան ոչ թե պատմական հետազոտությունների, այլ գործարարությամբ զբաղվելու և շահույթի ակնկալիքով, մանավանդ որ Երևանում 100 տարեկանից ավելի տարեց շենք չեն թողել:

Մեր առաջին քրիստոնյա լինելը որքանո՞վ պիտի նպաստի նրանց դրամապանակի պարունակության բազմապատկմանը և հնագույն ազգը ի՞նչ ընդհանրություն պիտի ունենա նորագույն պահանջների հետ, որ ներկայացնում է ժամանակակից աշխարհը: Այնպես որ, մեր նոր վարչապետի՝ Հռոմից հին մտածողությունը հազիվ թե կարողանա երկիրը լցնել երազելի ներդրումներով:

shame.am