Սեպտեմբերմեկյան զանգը հանրապետության բոլոր ուսումնական հաստատություններում կրկին ազդարարում է նոր ուսումնական տարվա սկիզբը: Հերթական ուստարվա մեկնարկի և գիտելիքի օրվա կապակցությամբ ջերմորեն շնորհավորում եմ Ձեր դպրոցի բոլոր ուսուցիչներին և աշակերտներին և մաղթում բազմաբովանդակ, հետաքրքիր և արդյունավետ տարի:Հարգարժա՛ն ուսուցիչներ, իսկապես անփոխարինելի է Ձեր դերը մատաղ սերնդի կրթության և դաստիարակության գործում: Այդ ազգանվեր աշխատանքը, գիտենք, Ձեզնից պահանջում է ոչ միայն հարուստ գիտելիքներ, այլև անսպառ եռանդ, համբերատարություն և հետևողականություն:

Անչափ կարևոր է նաև, որ աշակերտներին անհրաժեշտ գիտելիքներ տալուց ոչ պակաս ուշադրություն եք դարձնում նրանց անհատականության ձևավորման խնդրին, հայրենասեր քաղաքացու կայացմանը: Դա, իսկապես, Ձեզ հաջողվում է՝ դատելով այսօրվա սերնդից, որի մասին միայն հիացմունքի խոսքեր կարելի է ասել:
Սիրելի՛ աշակերտներ, գիտելիքներ ձեռք բերելու լավագույն ժամանակը դպրոցական ուսումնառության տարիներն են, ուստի հնարավորինս խնամքով ու արդյունավետ օգտագործեք այդ ժամանակը, եթե ուզում եք հետագայում ափսոսալու առիթներ չունենաք:
Առանձնահատուկ ջերմ շնորհավորանքներս առաջին դասարանցիներին և նրանց ծնողներին: Թող դպրոց ոտք դնելու առաջին օրվա տպավորությունները անջնջելի մնան Ձեր ողջ կյանքում:
Բարի՛ երթ, նոր ուսումնական տարի:

ՔԱՂԱՔԱՊԵՏ Կ. ԳՐԻԳՈՐՅԱՆ