Ռուսաստանի հայերի միության նախագահ Արա Աբրահամյանը հայտնվել է ինքնահաստատման լուրջ խնդրի առաջ: Վերջինս հավանաբար չէր սպասում, որ հայրենակիցներն այդպես քամահրանքով ու ծաղրանքով կարձագանքեին իր՝ Հայաստանի քաղաքական դաշտ մուտք գործելու հեռանկարին: Եվ հիմա, անելանելի կացությունից դուրս գալու համար սկսել է կառչել փրփուրներից:

 Նա իբրև փրփուրի փրկարար չափաբաժին է դիտարկել իր փողերով գոյություն պահպանող մի քանի կայքերում սեփական անձի մասին հասարակական կարծիքի անցկացումը, որպեսզի իբրև թե «ձայն բազմաց»-ի անունից վերահաստատի անմիջական մասնակցությունը ՀՀ ներքաղաքական համայնապատկերի ձևավորման գործընթացին։ Հատկանշական է, որ այդ հարցումները կատարվել են այսպիսի հիմնավորմամբ. «Հաշվի առնելով հասարակական մեծ հետաքրքրվածությունը և երևույթի կարևորությունը»:

Այն, որ Արա Աբրահամյանը ոչ կարևոր է և ոչ էլ հետաքրքիր, վաղուց է հայտնի: Բայց և այնպես տեսնենք, թե պատվերն ինչպես է կյանքի կոչվել և ինչ արդյունքներ են նկարվել: Դա արվել է հետևյալ հարցադրմամբ. «Ինչպե՞ս եք վերաբերվում Արա Աբրահամյանի հայտարարությանը՝ հայաստանյան քաղաքական դաշտ մտնելու կապակցությամբ»: Եվ ահա պարզվել է, որ հարցման մասնակիցների մեծամասնությունը՝ 47%-ը, դրական է վերաբերվում Արա Աբրահամյանի վերոհիշյալ հայտարարությանը:

Այն, որ 100 տոկոսի մեջ 47-ը չի կարող համարվել մեծամասնություն, քանի որ նույնիսկ կեսը չէ, թողնենք մի կողմ: Շատ ավելի հետաքրքիր է եզրահանգումը, երբ կազմակերպիչները գրում են, թե սրանից «կարելի է ենթադրել, որ հարցվածները կարծում են, որ հայաստանյան քաղաքական դաշտում Արա Աբրահամյան գործիչն անելիք ունի»։

Տեսնես այդ ի՞նչ անելիքի մասին է խոսքը, որ այդքան հպարտորեն և ընդգծված նշվում է ամփոփիչ տեքստում: Հայոց նորահայտ փրկիչն այդ ի՞նչ լույս է բերելու իր հետ, որ ցրի մեր համատարած խավարը: Եվ այդ լույսից կուրացածները այնուհետև թեթև ձեռքով պիտի գրեն, որ հարցման մասնակիցների 31%-ը բացասական վերաբերմունք ունի վերոհիշյալ հայտարարության հետ կապված, իսկ ահա 22%-ի համար միևնույն է։

Խոստովանենք, որ վերջին կետն ամենաանկեղծն է: Իսկապես որ, Արա Աբրահամյանի գալ-չգալը հազարների համար միևնույն է: Աբրահամյանն ինքն էլ վաղուց միևնույն է իր հեռավոր գոյությամբ: Հազիվ թե Հայաստանում որևէ մեկի աչը սառչի ու սիրտը ճմլվի նրա կարոտից: Ու ոչ մի հարցում այդ կարոտը բազմապատկել չի կարող:

shame.am