Shame-ը գրում է. «Վանաձորցիների աչքը ջուր կտրեց Րաֆֆի Հովհաննիսյանի ու «Ժառանգության» ճանապարհը պահելով, որոնք խոստացել էին այդ քաղաքում երեք շաբաթ անընդմեջ միտինգ անել: Իսկ Րաֆֆին այդ ընթացքում, պարզվում է, հասել էր Փարիզ: Չէինք պնդի, թե Հայաստանի երրորդ քաղաքը կարելի է շփոթել Ֆրանսիայի մայրաքաղաքի հետ, բայց Րաֆֆիին նմանություններն ու տարբերությունները ավելի քիչ պիտի մտահոգեն, քանի որ նա այժմ շատ մեծ հոգսերի մեջ է: 

 Երբ Միացյալ Նահանգներում էր, ամերիկացիներին համոզում էր, որ Հայաստանում հեղափոխություն անելու համար իրեն ահռելի գումարներ են անհրաժեշտ: Ամերիկայում լսեցին նրան ու, ըստ շրջանառվող լուրերի, տվեցին ընդամենը 50 հազար դոլար: 50 հազարով հեղափոխություն անե՞լ կլինի: Այդքանը հազիվ Րաֆֆիին հերիքի 1-2 ամիս: Դրա համար էլ մեր աննկուն հեղափոխականը թռավ Փարիզ: Հիմա էլ այնտեղ է փող մուրում հանուն գալիք Հայաստանի:

 Պատմում են, թե Ֆրանսիայում նա կապվել է «Նոր Հայաստանի» բարեկամ-հովանավորներից Շանթ Ոսկերչյանի հետ, ով Րաֆֆիի համար դահլիճ է վարձել, որպեսզի վերջինս այնտեղ հանդիպում անցկացնի տեղի հայերի հետ: Ում կարողացել՝ հրավիրել են, բայց արի ու տես՝ հսկայական դահլիճում ընդամենը 35-40 մարդ է հավաքվել: Այսքան մարդու տված փողն ի՞նչ պիտի լինի: Որքան էլ Հովհաննիսյանն իրեն կոտորել է, քրտինք մտած ելույթ է ունեցել, բողոքել է ՀՀ իշխանություններից, ընդգծել է Հայաստանում հեղափոխություն անելու անհրաժեշտությունը և ասել է, թե այդ հեղափոխություն անող միակ ու անփոխարինելի թեկնածուն ինքը կարող է լինել, ոչ ոք այդպես էլ ձեռքը գրպանը չի տարել:

Հիմա գործերը լավ չեն: Չկա փող, չկա հեղափոխություն: Իսկ առանց փողի նույնիսկ «Ժառանգության» նվիրյալները նրան բանի տեղ չեն դնի:»