«Tert.am»-ը գրում է.

Ճանապարհին կանգնեցրել են տղայիս, վիրավորել են, ծեծել են, հիմա բերել ուրիշ հարց են ուզում որդուս վրա դնեն: Իշխանական պատգամավոր է եղել իրենց հետ, բայց չի իջել, չի խառնվել կռվին, մեքենայի միջից հետևել է:

Այս մասին Tert.am-ին ասաց Մալաթիա-Սեբաստիա վարչական շրջանի Տիչինայի փողոցում տեղի ունեցած ծեծկռտուքին մասնակցած Գոռ Բաղդասարյանի հայրը` Լյովա Բաղդասարյանը:

Հիշեցնենք, որ Shamshyan.com-ի տեղեկություններով՝ երեկ՝ հունիսի 21-ին, արտակարգ դեպք էր տեղի ունեցել Երևանում։ Ժամը 22։40-ի սահմաններում ոստիկանության Երևան քաղաքի վարչության 102 օպերատիվ կառավարման կենտրոն ահազանգել է Կոտայքի մարզի Զովունի գյուղի բնակիչ Հայկ Ստեփանյանը և հայտնել, որ Մալաթիա-Սեբաստիա վարչական շրջանի Տիչինայի փողոցում մոտ 40 հոգով իրեն ծեծի են ենթարկել։ Հայկ Ստեփանյանը ներկայացել է որպես «Հեղափոխության պահապաններ» նախաձեռնության հիմնադիր անդամ։
«Ճանապարհին Հայկ Ստեփանյանը կանգնեցրել է Գոռին, վիճել են, մի հասարակ հարց է եղել, մեքենայի ճանապարհ չեն տվել: Հայկ Ստեփանյանն իր «շքախմբով» սկսել է տղայիս ու իր ընկերոջը ծեծել, հենց տեղում ճանապարհի վրա: Իրենց հետ ԱԺ իշխանական պատգամավոր կար, անունը դեռ չեմ ուզում հրապարակել: Իրենք Աշտարակի ձորից վերադառնալիս են եղել, խնջույքի էին գնացել: Մեզ ասում են`10 հոգուց ավել հավաքվել չի կարելի, բայց իրենք 30-ից ավել մարդկանցով խնջույք են արել ու խմած ծեծկռտուք ստեղծել»,- պատմեց Գոռ Բաղդասարյանի հայրը:
Նա հերքեց մամուլում տարածված այն տեղեկությունը, թե Հայկ Ստեփանյանին 40 հոգով ծեծել են, նա նշեց, որ իր տղան ընկերոջ հետ է եղել, մինչև դեռ Հայկ Ստեփանյանի կողքին մոտ 5-6 մեքենայով մարդիկ են եղել: Ըստ նրա՝ դրանից հետո որդին, միևնույն է, փորձել է շտկել իրավիճակը, սակայն հայհոյանքներ են կրկին հնչել, որից հետո Հայկ Ստեփանյանին են ծեծել:
«Ո՞նց կարելի է, մյուսներին էինք ասում, բայց սրանք լրիվ անարխիստ են: Տղայիս թևն են կոտրել, ընկերոջ գլուխն են վնասել, չգիտեմ՝ ինչով են մեջքին խփել: «Հեղափոխության պահապան» է ներկայանում, բայց այդ հեղափոխությունն էլ մենք արեցինք, մեր ուժով են այդ մարդիկ հիմա աշխատում, Ապրիլյան պատերազմի ժամանակ էլ Քելբաջարում Փաշինյանենց հետ եմ եղել»,- ներկայացրեց և հավելեց, որ Ոստիկանության դիմաց է հիմա, փորձում է հետագա քայլերը դասավորել, որից հետո էլ կհրապարակի միջադեպին ներկա ԱԺ պատգամավորի անունը: