76-ամյա մոր աչքի առջև 58-ամյա որդու՝ Ե.Խաչատրյանի դաժան սպանության գործով չորս մեղադրյալներից մեկը՝ Յուրի Հակոբյանը, ներկայացրել է իբրև թե իր այլուրեքության փաստարկներ, որոնք քննչական գործողությունների արդյունքում հերքվել են: Այս մասին «Փաստինֆո»-ին հայտնեց միաժամանակ ականատես վկա և տուժող մոր՝ Էմմա Աբրահամյանի, ներկայացուցիչ, փաստաբան Ինեսսա Պետրոսյանը:

Փաստաբանը պարզաբանեց, որ իբրև թե այլուրեքության՝ այլ վայրում գտնվելու, հանգամանքը եղել է դեպքից ավելի ուշ՝ մոտավորապես 40 րոպե անց: Մասնավորապես դեպքը տեղի է ունեցել 2016թ. հունիսի 4-ին, ժամը 23-05 –23-12-ի սահմաններում, իսկ այլուրեքությունը վերաբերում է ժամը 23.40-ին: 
«Վեցից որևէ մեկը չպետք է խուսափի քրեական պատասխանատվությունից»,- ասաց Ի.Պետրոսյանը:

Դեպքը տեղի է ունեցել Նուբարաշենի խճուղու տարածքում: Մայրը ականատես է եղել վեց հոգու կողմից իր որդու՝ Եղիշե Խաչատրյանի, դաժան սպանությանը և մանրամասն ցուցմունքներ տվել դեպքի մասին:

Մայրը նշել է, որ իր որդին փաստորեն փրկել է այդ երիտասարդների կյանքը, ովքեր խախտելով ճանապարհային երթևեկության կանոնները, մեծ արագությամբ սլանում էին իրենց դեմ հանդիման: Եղիշե Խաչատրյանին հաջողվել է արգելակել և խուսափել վթարից: Դրանից հետո այդ մեքենայում գտնվող երեք երիտասարդները և մեկ երիտասարդ կին փորձել են Ե.Խաչատյանի հետ հարցեր պարզել, իջել են ավտոմեքենայից, որից հետո դաժանաբար ծեծի են ենթարկել Եղիշե Խաչատրյանին: Քիչ անց նրանց է միացել երկրորդ եռյակը, որոնք գետնին են տապալել Եղիշե Խաչատրյանին և վեց հոգով նրան այնքան են ծեծել՝ մինչև Եղիշե Խաչատրյանը տեղում մահացել է:

Սպանվածի մորը ևս, ով փորձում էր միջամտել ու օգնել իր որդուն, մի կողմ են հրել ու գետին տապալել: 76-ամյա կինը ստացել է միջին ծանրության մարմնական վնասվածք, ինչը հաստատվել է փորձագետի եզրակացությամբ:

Գործի քննությունն իրականացնում է Հատուկ քննչական ծառայությունը, քանի որ մեղադրյալներից մեկը՝ Խաչիկ Կոսյանը, ԴԱՀԿ աշխատակից է: Նա նախկինում կատարել է անզգույշ հանցագործություն՝ երկու երիտասարդ աղջիկների մահվանը հանգեցրած վրաերթ:

Նախաքննության շրջանակում մի շարք քննչական գործողություններ են իրականացվել: Գործով առանցքային վկա և տուժող Էմմա Աբրահամյանն իր որդուն դաժանորեն ծեծելով սպանած վեց հոգուց չորսին արդեն իսկ ճանաչման գործողություններով հստակորեն ճանաչել է: Նրանք են՝ Խաչիկ Կոսյանը, Արտաշես Չիչոյանը, Արարատ Նիկողոսյանը և Յուրի Հակոբյանը: 
Խաչիկ Կոսյանին տուժողը ճանաչել էր ավելի վաղ, դեպքից մեկ-երկու օր անց՝ իր որդու հոգեհանգստի օրը, երբ առողջական և հոգեբանորեն ծանր վիճակում է գտնվել, այդուհանդերձ մասնակցել է ճանաչման գործողությանը: Այնուհետև ճանաչման գործողություններ տեղի են ունեցել մյուս երեքի հետ կապված, նրանցից մեկին՝ Յուրի Հակոբյանին, տուժողը ճանաչել է իր ներկայացուցչի մասնակցությամբ: Վարույթ իրականացնող նախաքննական մարմինը անմիջապես ձերբակալել է Յուրի Հակոբյանին, հետագայում նա նաև կալանավորվել է:

Յուրի Հակոբյանի հետ տեղի է ունեցել նաև առերեսման քննչական գործողություն, որի ժամանակ Էմմա Աբրահամյանը պնդել է, որ իր հետ առերեսվողը մասնակիցներից ու ծեծելով իր որդուն սպանողնեից մեկն է եղել:

Ըստ տուժող կողմի տեղեկությունների, հիշյալ չորս անձանց մեղադրանքներ են առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ ու 10-րդ կետերով՝ մի խումբ անձանց կամ կազմակերպված խմբի կողմից խուլիգանական դրդումներով սպանություն: Դեռևս մնում է պարզել մյուս երկուսի հարցը, թեև տուժող կողմի համար դա էլ է պարզ:

«Վարույթ իրականացնող մարմինը տիրապետում է ամբողջ տեղեկատվությանը, թե ովքեր են այդ մյուս երկուսը: Սակայն այս պահի դրությամբ նրանց դեռևս մեղադրանքներ առաջադրված չեն»,- ասաց Ի.Պետրոսյանը:

Երկու անձանց՝ համակատարողների, քրեական հետապնդման ենթարկելու հարցը լուծվի քննչական ու դատավարական գործողությունների կատարման արդյունքում ձեռք բերված ապացույցների հիման վրա:

Տուժող կողմը խնդրել է նախաքննական մարմնին նկատի ունենալ Էմմա Աբրահամյանի հոգեկան ապրումները, հոգեբանական շատ ծանր վիճակը. նա հոգեբանական թերապիա է անցնում: Մանավանդ որ տուժողը հայտնել էր, որ վերջին երկուսի դեմքերն ինքն աղոտ է հիշում, և հնարավոր է, որ չճանաչի: Ի.Պետրոսյանը պարզաբանեց, որ վերջին երկուսը երկրորդ եռյակի մեջ են եղել, իսկ տուժողն այդ ժամանակ արդեն եղել է գլուխը կորցրած վիճակում՝ այդ ժամանակ որդուն տապալել էին գետնին և ինքն արդեն հասկանում էր, որ որդուն նրանք սպանում են, ուստի այդ պահի դեպքերն աղոտ է հիշում:

«Եթե տուժողը ներկա չգտնվեր, կարո՞ղ էր այդ հանցագործությունը մինչև վերջ չբացահայտվել, և մենք կունենայի՞նք մի այնպիսի իրավիճակ, որ շատ ծանր, դաժան հանցագործություն կատարած անձինք մնային անպատիժ և քրեական պատասխանատվությունից խուսափեին»,- նկատեց փաստաբանը:

pastinfo.am