Երեւանի ավագանու անդամ, «Ժառանգություն» կուսակցության մամուլի խոսնակ Դավիթ Սանասարյանն այսօր Խորենացի փողոցում բացօթյա մամուլի ասուլիսի ընթացքում լրագրողներին ներկայացրեց այն խոշտանգումները, որոնց ենթարկվել է երեկ Ազատության հրապարակից բերման ենթարկվելու ընթացքում.

«Հավաքի ընթացքում ես առաջարկեցի քաղաքացիներին, որպեսզի երթով շարժվենք այստեղ եւ այդ ընթացքում իրազեկենք քաղաքացիներին, թե ինչ է տեղի ունենում։ Դրանից անմիջապես հետո, երբ փորձում էի պատասխանել լրագրողների հարցերին, եկան, բռնի ուժով տեղափոխեցին մեքենա։ Առաջին հարվածը կերա, երբ գլուխս դուրս հանեցի եւ փորձ արեցի քաղաքացիներին կոչ անել, որ դուրս գան փողոց։ Երբ կարմիր բերետավորն ինձ հարվածեց, աչքերիցս կայծ թռավ, այդ պահին հայհոյեցի նրան ու չեմ փոշմանում։ Մեքենայում երեքիս՝ ինձ, Անդրանիկ Ասալանյանին եւ Արթուր Սարգսյանին, սկսեցին հարվածել։ Նման գազանություն չի եղել երբեւէ։ 15 անգամ բռունցքով գլխիս հարված եմ ստացել, ինչքան կարողացել են, խփել են։ Երբ հասանք ոստիկանության զորամաս, ոտքերիցս քարշ տալով ինձ դուրս հանեցին մեքենայից եւ կրունկով խփեցին»,-պատմեց Սանասարյանը՝ հավելելով, որ այդ ընթացքում ոստիկանները սեռական բնույթի հայհոյանքներ էին հղում իրենց։

«Գրեթե բոլոր բերման ենթարկվածներին նույն նախադասությունն էին ասում՝ այսուհետ ինչ եղել է, էլ նույն կերպ չի լինելու։ Այսինքն՝ իրենք դադարեցնելու են Վովայի թատերական արվեստն ու անցնելու են բռնի ուժի»,-նշեց նա։

Դավիթ Սանասարյանը թեեւ չէր ցանկանում, բայց պատմեց նաեւ ոստիկանների կողմից նվաստացման մասին.

«Այն ոստիկանն, ով առանձնակի դաժան էր, նրան արդեն դեմքով գիտեմ, այսպիսի արտահայտություն արեց մեր հասցեին՝ իջեցրեք, թող բոլորիդ բատինկեքը լպստեն։ Իհարկե, նման բան չարեցինք։ Չէի ցանկանում ասել, բայց ձեռնաշղթայված վիճակում նա թքել է վրաս։ Այսպես չենք թողնելու, Վովայի փչած փուչիկը տրաքացնելու ենք»։

Հավելենք, որ խոշտանգումների արդյունքում Սանասարյանը ուղեղի ցնցում է ստացել։

a1plus.am