Ազգային ժողովի Հայ հեղափոխական դաշնակցություն խմբակցության նոր պատգամավորը Կարեն Շահմուրադյանը, ով ՀՅԴ համամասնական ցուցակով է ԱԺ-ում հայտնվել, կարծում է, թե ԱԺ-ում բիզնեսով զբաղվող պատգամավորներ չկան, ինքը եւս բիզնեսով չի զբաղվում, քանի որ պատգամավոր դառնալուց հետո մինչ օրս զբաղվող գործով շարունակում է զբաղվել իր եղբայրը:

Նշենք, որ Շահմուրադյանին է պատկանում «Կարկոմավտո» ընկերությանը: Պատգամավորը իր բիզնես գործունեության, Սերժ Սարգսյանի փեսայի հետ ունեցած կապի եւ ԱԺ-ում բիզնեսմեն պատգամավորների վերաբերյալ հարցուպատասխան ունեցավ խորհրդարանական լրագրողների հետ, որը ներկայացնում ենք ստորեւ:

-Որպես պատգամավոր չե՞ք տեսնում հակասություն ձեր երկու գործունեության միջեւ՝ բիզնեսի եւ պատգամավորական գործունեության:

-Երբ պատգամավորը սկսում է զբաղվել պատգամավորական աշխատանքով, նա իրավունք չունի զբաղվել որեւէ այլ գործունեությամբ եւ բնականաբար ես բիզնեսով չեմ զբաղվելու:

-Ո՞ւմ եք այդ դեպքում փոխանցել ձեր բիզնեսը:

-Ոչ մեկին էլ գաղտնիք չի, որ այդ բիզնեսը մենք ժառանգել ենք եւ այդ բիզնեսի մեջ եղբորս հետ ենք` միասին, եւ կզբաղվի բիզնեսով եղբայրս:

-Պարոն Շահմուրադյան, ՀՅԴ-իշխանություն Քաղաքական համագործակցության հուշագրում ասվում է, որ պետք է իշխանությունը տարանջատել բիզնեսից: Ինչպե՞ս եք պատրասվում պայքարել այդ իշխանավորների դեմ, ովքեր բիզնես ունեն, ովքեր խորհրդարանում նստած են, բայց շարունակում են զբաղվել բիզնեսով:

-Ես, ճիշտն ասած, չգիտեմ այդ մարդկանց անունները, ով է զբաղվում բիզնեսով, բայց գիտեք ինչ, հստակ օրենք գոյություն ունի եւ օրենքն էլ սահմանում է՝ այն մարդիկ, որոնք պատգամավոր են ընտրվել, իրենք իրավունք չունեն զբաղվել բիզնեսով եւ ինձ թվում է՝ այս ԱԺ-ում չկան նմանատիպ մարդիկ: Այսինքն, բոլոր մարդիկ էլ, որոնք պատգամավորի աշխատանքով են զբաղվում՝ բիզնեսով չեն զբաղվում: Իրենք հնարավոր է, ունեն ակցիաներ, արժեթղթեր, ինչ-որ չափով ընդհանուր փաթեթում ներառված են, բնականաբար, սեփականտեր են ինչ-որ արժեթղթերի: Այսինքն՝ ակցիաների պակետի մեջ իրենք կան, բայց անմիջապես իրենք չեն զբաղվում բիզնեսով:

-Իրենց ազնվությանը հավատում եք, փաստորեն:

-Դե, դա հակասում է օրենքին: Ինձ չի թվում, որ նմանատիպ մարդիկ կան:

-Սերժ Սարգսյանի փեսայի՝ Միքայել Մինասյանի հետ ձեր հարաբերություններն ինչպե՞ս են:

-Դե, մենք մանկության ընկերներ ենք:

-Որքանո՞վ է նա ձեզ օգնել հայտնվել խորհրդարանում:

-Ոչնչով:

-Պարոն Շահմուրադյան, Դուք ՀՅԴ անդամ չեք, նորմա՞լ եք համարում, որ ՀՅԴ-ն գնաց իշխանությունների հետ կոալիցիոն կառավարման:

-Համաձայնագրի հետ բոլորդ ծանոթ եք, չէ՞, կետերը տեսե՞լ եք: Դուք ինքներդ պատասխանեք՝ ինչ-որ հակասություն կա՞ ընդհանուր սոցիալ-տնտեսական կարգավիճակը բարելավելու հետ, թե` ոչ:

-Բայց որեւէ գործիք չկա, թե ոնց է դա արվելու, գեղեցիկ արտահայտություններն իրականություն դառնալու:

-Գեղեցիկ արտահայտություններ չեն:

-Դրա համար էլ վստահություն չի ներշնչում:

-Ոչ մեկին վստահություն չի՞ ներշնչում: Ինձ թվում է՝ այդ հարցը… դեռ կտեսնենք ապագան ինչ ցույց չկտա: Համաձայնագիրը կա, իհարկե, եթե կողմերը կկարողանան համերաշխ աշխատեն, ուրեմն կաշխատենք եւ ոչ մի վատ բան չեմ տեսնում:

-Ձեր ներդումը ո՞րն է լինելու, ԱԺ ընտրություններին մնացել է մեկ տարի, ձեր ընտրողն ի՞նչ պետք է ակնկալի ձեզանից:

-Ես տարբեր հանձնաժողովների անդամ եմ, չգիտեմ ձանոթացել եք, թե ոչ: Դա կրթությունն է, տարածքային կառավարումը եւ մարդու իրավունքները:

-Եվ ի՞նչ ծրագրեր ունեք:

-Առայժմ ծրագրեր չունեմ, քանի որ նոր ընտրված պատգամավոր եմ: Ժամանակ տվեք:

-Նորմա՞լ եք համարում, որ մեկ նախարարությունը կարող են միացնել մյուսին, հետո մեկ տարի անց քաղաքական համագործակցության համար այն տարանջատել:

-Դեռեւս ոչ մի հարցի նմանատիպ պրոֆիլի չեմ կարող պատասխանել, ձեզ կկրկնեմ՝ եկեք մեկ ամիս հետո հանդիպենք, մեկ ամիս կամ 40 օր, ինչեւիցե, ես ձեր բոլոր հարցերին կպատասխանեմ:

-Բայց ընտրված չեք, համամասնական ցուցակով եք անցել:

-Այո համամսնական ցուցակով եմ ընտրվել:

-Ասում եք՝ ընտրվել եմ:

-Դե համամասնական ցուցակով եմ անցել:

-Կարո՞ղ եք վստահեցնել, որ չեք լինելու այն կոճակ սեղմող պատգամավորներից:

-Այ, գիտե՞ք ինչ, դա վստահեցնում եմ՝ այո:

-Մամուլում շատ գրվեց այն մասին, որ դուք բավական մեծ, կլոր գումար եք տվել ՀՅԴ-ին ցուցակում հայտնվելու համար: Ի վերջո դուք ո՞նց հայտնվեցիք ցուցակում:

-Ես չեմ հասկանում այդ խոսակցությունն ով է տարածում: Կարո՞ղ եք ինձ պատասխանել:

-Մամուլի աղբյուրները:

-Մամուլի աղբյուրները որո՞նք են: Այնտեղ գրված է ինչ-որ, ես ինքս եմ կարդացել, մեկ միլիոնի մասին եւ այլն եւ այլն: Ինչի՞ համար ես մեկ միլիոն պետք է վճարեմ:

-Որ պատգամավոր դառնաք:

-Ես ուզում եմ հասկանալ, եթե ես գործարար եմ, ձեր ասածով, այդ մանդատն ինձ ինչո՞վ պետք է օգնի, որ ես բարելավեմ իմ բիզնեսը:

-Օրինակ՝ դուք մի օրենսդրական նախաձեռնությանը կողմ քվեարկեք, որը կարող է հարկային արտոնություն տալ ձեր իսկ բիզնեսին: Դուք դա մեզանից լավ գիտեք:

-Ես ինձ չեմ համարում ոչ հաջողակ բիզնեսմեն, որը կարիք ունի հայտնի պառլամենտում եւ դրանով ինչ-որ լծակներ ստեղծի, որ բարելավի իր ոչ այդքան լավ կարգավիճակը: Մենք նմանատիպ խնդիր չունենք, մեր բիզնեսը նորմալ է, չնայած որ այս ճգնաժամը կա, գիտեք մի քիչ դժվարանում ենք բոլորս, բայց ես խնդիր չեմ տեսնում ընդհանուր առմամբ:

Առավել մանրամասն՝ տեսանյութում:

armtimes.com