«Ճի՞շտ հունով է արդյոք ընթանում նոր իշխանության պայքարը կոռուպցիայի դեմ, և արդարացնո՞ւմ է արդյոք հասարակության բոլոր շերտերի ակնկալիքները: Վերջին օրերին հատուկ գործողություններ են իրականացվում, աղմկոտ բացահայտումներ են տեղի ունենում: Այս զարգացումների շուրջ ներկայացնելով իր դիտարկումները՝ «Առաջին լրատվական»- ի հետ զրույցում քաղաքագետ Սուրեն Զոլյանը նշեց. «Տարբեր տեսանկյունից կարելի է դիտարկել: Իհարկե, այն ինչ արվում է, անհրաժեշտ քայլեր են, որովհետև անհնար է որևէ բան կառուցել, եթե չմաքրես կոռուպցիան. դա «ավգյան ախոռների» մաքրում է, բայց մաքրելով պետք է նաև մտածել՝ պետք է թողնել նույն ախոռնե՞րը, թե՞ նոր ախոռներ պետք է կառուցել, միգուցե ախոռը փոխարինում ենք ա՞յլ բանով: Բացի այս աղմկահարույց բացահայտումներից՝ ես չեմ տեսնում համակարգային փոփոխություն:
Նախկինում, մենք տեսնում էինք կոռուպցիայի դեմ պայքարի իմիտացիա, բայց կոռուպցիան զարգանում էր: Ստեղծվել էր քրեաօլիգարխիկ համակարգ. դա հենց կոռուպցիոն համակարգն էր. ֆորմալ իշխանության հետ գոյություն ուներ ստվերային իշխանությունը, որը կաշառակերության ու ատկատների միջոցով ամեն ինչը դարձրել էր առքուվաճառքի առարկա՝ սկսած պաշտոններից և այլն: Ռեսուրսների բաշխման մեխանիզմ է գործել՝ կոռուպցիոն սխեմայով:
Ես որոշակի վերապահումներ ունեմ, եթե պայքարն անձերի դեմ է, թեև առանցքային կերպարներ են՝ թե՛ գեներալ Մ. Գրիգորյանը, թե՛ Վաչագան Ղազարյանը պատահական մարդիկ չեն, նրանք սիմվոլներ են… Բայց այս անձերը չեն այդ համակարգը ստեղծել, նրանք որոշում կայացնողների շարքում չէին: Պետք է հստակեցվի կոռուպցիայի դեմ պայքարի ռազմավարությունը և այն, թե որն է ներելու և քավության սահմանը»:
Քաղաքագետի դիտարկմամբ՝ տեղի ունեցածը իշխանափոխություն է՝ առաջնորդների փոփոխություն. «Հեղափոխության արդյունքները դեռ չենք տեսել: Հեղափոխությունը, բացի իշխանափոխությունից, նաև համակարգի փոփոխություն է: Եթե տեսնենք, որ քրեաօլիգարխիկ համակարգից անցել ենք մի նոր համակարգի, այն ժամանակ կխոսենք հեղափոխության հաղթանակից»:
Մանրամասն՝ տեսանյութում: