Ավան եւ Նոր Նորք վարչական շրջանների ընդհանուր իրավասության դատարանում դատավոր Արտուշ Գաբրիելյանի նախագահությամբ շարունակվում է «Սասնա ծռեր» խմբի 18 անդամի գործով արտագնա դատական նիստը:
Նիստը սկսվելուց առաջ կրկին պաշտպաններ Մուշեղ Շուշանյանը, Արայիկ Պապիկյանը եւ Նինա Կարապետյանցը չկարողացան մտնել նիստերի դահլիճ։ Կարգադրիչները ցանկանում էին, որպեսզի նրանց պայուսակները զննել, սակայն փաստաբանները թույլ չտվեցին։
Դատական կարգադրիչներն արձանագրություններ կազմեցին նրանց հրաժարվելու վերաբերյալ, իսկ պաշտպանները՝ գրեցին իրենց առարկությունները։
Խմբի 18 անդամից այսօր նիստերի դահլիճ է ներկայացվել միայն Արամ Մանուկյանը եւ Հովհաննես Հարությունյանը: Մյուսները նախորդ նիստերից ժամերով հեռացվել են նիստերի դահլիճից:
Այսօր դատական նիստին չէին ներկայացել փաստաբաններ Լուսինե Սահակյանը, Մոնիկա Մարգարյանը, Մուշեղ Շուշանյանը, Նինա Կարապետյանցը, Արայիկ Պապիկյանը եւ Լիպարիտ Սիմոնյանը: Վերջինս դատարանին դիմում էր գրել՝ նշելով, որ այսօր նույն ժամին այլ դատարանում դատական նիստի է հետեւաբար միջնորդություն է իր պաշտպանյալ Թորոս Թորոսյանի եւ մյուսների գործով դատական նիստը հետաձգել: Դատավոր Արտուշ Գաբրիելյանն ասաց, որ Լիպարիտ Սիմոնյանն արդեն 4-րդ դատական նիստն է չի ներկայանում: Պաշտպաններն ասացին, որ ըստ էության, դատական նիստ տեղի չի էլ ունեցել:
Գաբրիելյանը որոշեց դատական նիստերի դահլիճ բերել հեռացված Թորոս Թորոսյանին եւ հետաքրքրվել, թե արդյոք վերջինս այլ պաշտպան ցանկանում է կամ հրաժարվում է Լիպարիտ Սիմոնյանի ծառայություններից, թե՝ ոչ: Թորոս Թորոսյանը հայտարարեց, որ այլ պաշտպան չունի եւ ցանկանում է, որպեսզի իր շահերը դատարանում ներկայացնի Լիպարիտ Սիմոնյանը: Եվ չնայած ամբաստանյալի դիրքորոշմանն Արտուշ Գաբրիելյանը որոշեց՝ քանի որ Թորոս Թորոսյանը հեռացված է նիստերի դահլիճից, ուստի պաշտպանի ներկայությունը պարտադիր է. հետեւաբար որոշեց դիմել Հանրային պաշտպանի գրասենյակ Թորոսյանին հանրային պաշտպանով ապահովելու համար:
Դատավորի որոշումը հանրային պաշտպան տրամադրելու վերաբերյալ առաջացրեց պաշտպանական կողմի դժգոհությունը։ Հրանտ Գեւորգյանը նշեց, որ այնպիսի տպավորություն է ստեղծվել, թե դատարանը ցանկանում է հանրային պաշտպաններով դատական նիստ անցկացնել: Դատարանի գործողությունների դեմ առարկեց նաեւ Արամ Մանուկյանի մյուս պաշտպան Ինեսսա Պետրոսյանը. «Հանրային պաշտպաններն ինչ-որ մեկի կամակատա՞րն են լինելու, ձեր գործողություններն անօրինական են»,- հայտարարեց Պետրոսյանը: Դատավորն էլ ասաց, թե պաշտպանները պարբերաբար նույնն են կրկնում:
Դատավորն այսօր որոշեց նաեւ ճշտել ամբաստանյալներ Տիգրան Մանուկյանի եւ Թաթուլ Թամրազյանի կարծիքը՝ արդյո՞ք նրանք ցանկանում են հանրային պաշտպան ունենալ։ Նրանց պաշտպան Մոնիկա Մարգարյանը եւս չէր ներկայացել դատարան։ Ամբաստանյալները նշեցին, որ չեն հրաժարվում իրենց պաշտպանից եւ իրենց հանրային պաշտպան պետք չէ։ Երբ Տիգրան Մանուկյանը փորձում էր հայտարարությամբ հանդես գալ, Գաբրիելյանը նրան նկատողություն արեց իրեն ընդհատելու համար, ապա դիմելով ամբաստանյալի կողքին նստած փաստաբան Գրիշա Բալասանյանին ասաց՝ Թորոսյանին ասացեք, որ դատավորին ընդհատել չի կարելի: Ի պատասխան Բալասանյանն ասաց, որ ինքը Թորոսյանի պաշտպանը չէ, Գաբրիելյանն էլ հակադարձեց. «Կապ չունի»: «Դատարանը չի փայլել կարգապահությամբ, որ մեզ սովորեցնի կարգապահություն»,- արձագանքեց Տիգրան Մանուկյանը։
Շարունակությունը՝ այստեղ