«Փաստինֆո» գործակալությունը տեղեկություն է տարածել Սանասար Բաղդասարյանի անունով ստացված էլեկտրոնային նամակի մասին, որում նշվում է, որ ՊԵԿ աշխատակիցները մուտք են գործել «Քեթրին Գրուպ» ՍՊԸ տարածք։ «Մեր աղբյուրների փոխանցմամբ՝ հունիսի 9-ի առավոտյան ՊԵԿ շուրջ 50 զինված աշխատակիցներ մուտք են գործել «Քեթրին Գրուպ» ՍՊԸ տարածք։

Առանց անհրաժեշտ հիմնավորումների՝ առգրավվել են ընկերության բոլոր համակարգիչները, չհրկիզվող պահարաններն ու ամբողջ փաստաթղթերը»,- նշված է հաղորդագրության մեջ։ Հիշեցնենք, որ մամուլի հրապարակումների համաձայն՝ Քեթրին գրուպը պատկանում է ԴԱՀԿ նախկին պետ, ներկայիս ՀՀԿ պատգամավոր Միհրան Պողոսյանին, որի անունը շրջանառվեց նաև օֆշորային պատմության համատեքստում:

Միհրան Պողոսյանը, սակայն, հերքում է իր առնչությունը թե՛ Քեթրին Գրուպին, թե՛ օֆշորային պատմությանը: Պողոսյանը հայտարարում է, որ եղել է Քեթրինի հիմնադիրը, սակայն հետո դադարեցրել է կապն ընկերության հետ: Նշենք նաեւ, որ մամուլը Քեթրին գրուպին վերագրում էր Հայաստան բանանի ներկրման մենաշնորհը:

Կառավարության փոփոխությունից հետո ՊԵԿ-ը հայտարարեց, որ գործարարներից մեկը փորձել է Հայաստան ներկրել բանան, սակայն անհայտ անձինք փորձել են խոչընդոտել:

ՊԵԿ-ը հայտարարեց, թե ապահովել է գործարարի նախաձեռնության անվտանգ իրականացումը: Հայտարարվեց, որ փաստացի լուծել են բանանի մենաշնորհի հարցը, եւ այժմ ներկրում իրականացնում են շատ սուբյեկտներ:

Մամուլում թեև լինում են հրապարակումներ, որոնցում նշվում է, որ իրականում ներկրումը այնքան էլ ապամենաշնորհված չէ, քանի որ ներկրող մի քանի ընկերությունները ևս պատկանում են Միհրան Պողոսյանին:

Տեղեկատվությունը պաշտոնապես չի հերքվել ո՛չ Քեթրինի, ո՛չ էլ ՊԵԿ-ի կողմից, ինչից հետևում է, որ միջադեպ իսկապես եղել է:

Պեկ-ի հատուկ նշանակության գործողությունը ԴԱՀԿ նախկին պետի ընկերության նկատմամբ դիտարժան է հատկապես վերջին շրջանում քաղաքական կուլիսներում հաճախ քննարկվող վարչապետ-նախագահ դիմակայության համատեքստում: Հայտնի է, որ Միհրան Պողոսյանը վայելում է նախագահ Սերժ Սարգսյանի բարեհաճութունը, որի ուղղակի արդյունքն է նաև Քեթրին ընկերության բանանի մենաշնորհը:

Այդ նույն բարեհաճության արտահայտությունն էր նաև Միհրան Պողոսյանի ստացած պատգամավորական մանդատը:

Կարեն Կարապետյանը, ով նոր մարդ է իշխանական բուրգում, սեփական դիրքի ամրապնդման խնդիր ունի: Այդ գործընթացի վարչապետին կարծես թե հեշտ չի տրվում, թեպետ հրապարակային մակարդակում այդ մասին շատ բան չի խոսվում: Բայց որ Սերժ Սարգսյան-Կարեն Կարապետյան տիրույթում կա խնդիր, դա փաստ է, հակառակ պարագայում հավասարակշիռ մարտավարությամբ հայտնի Սերժ Սարգսյանը հազիվ թե հրապարակավ անդրադառնար վարչապետ Կարեն Կարապետյանի հնարավոր հրաժարականին:

Նախորդ շաբաթ՝ Տավուշ կատարած այցի ժամանակ, նախագահը, մեկնաբանելով ԶԼՄ-ներում տեղ գտած լրատվական արտահոսքերը, հայտարարեց, թե Կարեն Կարապետյանը հրաժարական տալու որևէ պատճառ չունի: 

Շարունակությունը՝ այստեղ