Առողջապահության նախարար Լևոն Ալթունյանը «Արմենիա» հեռուստաընկերության «Ռ-էվոլյուցիա» հաղորդման եթերում՝ ի պատասխան հարցի, թե արդյոք ճիշտ են այն խոսակցությունները, թե ուսանողական պոլիկլինիկան լուծարվում է՝ նախարարի սեփականությունը համարվող  «Վարդանանց» բուժկենտրոնի բիզնեսը զարգացնելու նպատակով, հնչել է ուշագրավ պատասխան:

«50 տոկոսով համապատասխանում է իրականությանը, 50 տոկոսով՝ ոչ»,- հայտարարել է Լևոն Ալթունյանը: Այնուհետև, երբ նախարարը մանրամասնել է, թե ուսանողական պոլիկլինակայի լուծարումից հետո ինչպես է կազմակերպվելու ուսանողների առաջնային բուժօգնությունը, ակնհայտ է դարձել, որ  ուսանողական պոլիկլինիկայի լուծարման արդյունքում նրա բիզնեսն անպայման ունենալու է աճ:

«Նախարարությունն առաջարկել է լուծարել Ուսանողական պոլիկլինիկան օպտիմիզացիայի, բարեփոխումների  բաղադրիչի սահմաններում: Առողջապահության բյուջեն սահմանափակ է, և մենք պետք է մեր հնարավորություններն ու կարիքներն իրար հետ համադրենք:

Հայաստանի առողջապահությունն առաջնային օղակում աշխատում է կցագրման սկզբունքով: Այսինքն՝ Հայաստանի յուրաքանչյուր բնակիչ կցագրվում է ինչ-որ առաջնային օղակի՝ պոլիկլինիկայի, և պոլիկլինիկան այդ անձի համար տարեկան մոտ 6 հազար դրամ սպասարկման գումար է ստանում պետությունից: Ինչ ունենք ուսանողների դեպքում: 6 հազար դրամ ստանում է նրա տարածքային պոլիկլինիկան, ԲՈւՀ ընդունվելուց հետո 6 հազար դրամ էլ սկսում է ստանալ Ուսանողական պոլիկլինիկան: Այսինքն՝ ուսանողների համար, որոնք շատ հազվադեպ են դիմում Ուսանողական պոլիկլինիկա, բյուջեից դուրս են գրվում կրկնակի կցագրման գումարներ: Սա չի արդարացվում ոչ իրենց առողջական վիճակով, ոչ դիմելիությամբ, ոչ անհրաժեշտությամբ»,- ասել է նախարարը:
Ըստ նրա՝ ուսանողական պոլիկլինիկան այսօր սպասարկում է շուրջ 56-58 հազար ուսանողի և համապատասխանաբար ստանում յուրաքանչյուրի համար 6 հազար դրամ գումար, այսինքն՝ տարեկան մոտ 330 մլն դրամ ֆինանսավորում:
Նախարարը համոզված է, որ ուսանողների մեծ մասը չի օգտվում այս ծառայությունից, ուստի այդ գումարները արդյունավետ չեն ծախսվում, ուստի  ուսանողական պոլիկլինիկան պետք է փակել: Ուշադրություն, ոչ թե բարելավել աշխատանքը, այլ փակել: Իսկ փակումից հետո գործի է դրվում մի մեխանիզմ, որն անպայման նպաստելու է նախարարի անձնական բիզնեսին:
«Ենթադրենք 56 հազար ուսանող ունենք, նրանց մոտավորապես կեսը՝ 28 հազարը Երևանի բնակիչներ են: Իրենք ունեն իրենց տարածքային պոլիկլինիկաները, որտեղ կցագրված են: Մարզերի ուսանողները, որ սովորում են Երևանում և բուժում էին ստանում Ուսանողական պոլիկլինիկայում, կկցագրվեն ԲՈւՀ-ին ամենամոտը գտնվող երկու-երեք պոլիկլինիկաներին՝ համամասնության սկզբունքով, եթե նշված «Վարդանանց» բուժհաստատությունը գտնվի այդ 2-3 պոլիկլինիկաների շարքում, ապա այն կստանա համամասնորեն ուսանողների քանակ»,- բացատրել է նախարարը և ավելացրել, որ ուսանողը ԲՈւՀ ընդունվելիս կլրացնի համապատասխան հարցաթերթիկ, անկետա և միանգամից կա՛մ իր նախընտրանքով, կա՛մ էլ բուհի ցուցումով կկցագրվի մոտակա 2-3 պոլիկլինիկաներից մեկին:

Լևոն Ալթունյանին պատկանող «Վարդանանց» կլինիկան գտնվում է Վարդանանց փողոցում՝ Խանջյան-Վարդանանց խաչմերուկից հեռու է ընդամենը 50 մետր: Այսինքն՝ նախարարին պատկանող բուժհիմնարկը գրեթե ցանկացած բուհի պարագայում կարող է ընդգրկվել մոտակա 3 պոլիկլինիկաների ցանկում:

Ահա և վերջ՝ կասեր դասականը: Նախարարը ցուցաբերել է նորարար մոտեցում՝ սեփական բիզնեսի զարգացման հարցում: Իսկ մնացածը, ինչպես արդեն ասել է, 50/50:

hayeli.am