Այսօր Արցախի լրագրողների մասնագիտական տոնն է: Կարող է հարց ծագել` ինչու՞ միայն Արցախի լրագրողների...Կարծես չեմ էլ ակնկալում հարցիս պատասխանը լսելու, բայց մի ներքին հպարտություն զգացնել է տալիս իրեն, որ տարվա ընթացքում կա մեկ առանձին օր` մայիսի 23-ը, որ նշվում է Արցախի լրագրողների մասնագիտական տոնը:
Միշտ էլ ուսուցչուհուս առիթ է եղել շփվելու լրագրողների հետ, երբ այս կամ այն հոդվածով թղթակցել եմ որևէ մամուլի, երբեմն էլ հարցազրույցով հայտնվել Արցախի հեռուստատեսության էկրանից այն կողմ կամ ներկայացել հանրային ռադիոյով: Առանձնակի հարգանք ունեմ այս ոլորտի նկատմամբ, երբ համոզված եմ, որ դժվարին ու պատասխանատու աշխատանք է պահանջվում լրագրողներից, որպեսզի կարողանան արդարացնել հանրության սպասելիքները:
Կարելի է ասել, որ այն նաև «վտանգավոր» ասպարեզ է, որովհետև միշտ չէ, որ ակնկալվում է լսել դյուրինը, երբեմն լրագրողական աշխատանքի ճշմարտացի բացահայտումները կարող են նրանց աչքի փուշ դարձնել շրջապատում, բայց նաև համոզված եմ, որ լրագրողն իր անաչառ ու անկողմնակալ խոսքով պիտի կարողանա հաղթահարել նման անջրպետը:
Լրագրողներին էլ ի վերուստ է տրված հայրենիքին ծառայելու վեհ կոչումը, նրանք էլ կրում են կյանքի դառնությունները, դառնում իրենց երկրի տխուր և ուրախ օրերի երգիչը, ստանձնում վեր հանելու ժամանակի հրատապ ու խնդրահարույց հարցերը, ապրում ժողովրդի մտահոգությամբ, քանի որ առաջին հերթին նրանց է վերապահված իրականության ճշմարտացի լուսաբանումը:
Լրագրողն է, որ իր հավաքական կերպարով ներկայացնում է իր երկիրը, ապրած միջավայրը, դառնում անանձնական տրամադրությունների արտահայտիչը: Լրագրողն է, որ մաքուր գրական լեզուն ի ցույց է դնում հանրությանը, դառնում իր լեզվի կենսունակ պահողը: Նա իր մեջ կրում է դարի շունչը և իր ազգային մշակույթի կրողն է: Նրա տեսադաշտում մարդն է, որ արարում է, պայքարում` անկախ մասնագիտությունից ու տարիքից:
Անցած դարավերջի Արցախյան ազատագրական պատերազմը և հետպատերազմյան ժամանակաշրջանը, նոր դարասկզբի հարաբերական խաղաղությունն ու ապրիլյան պատերազմը լրագրողների համար մի նոր հերոսական ճանապարհ ամրագրեցին, նրանք էլ դարձան իրենց տեսակի մեջ զինվորներ, որ իրենց գրիչը ծառայեցրին հայրենիքին, և այսօր էլ նույն ոգով շարունակվում է նրանց մտավոր գործունեությունը:
Արցախի դպրոցի ուսուցչուհիս շնորհավորում է ոլորտի բոլոր լրագրողների մասնագիտական տոնը, ցանկանում ասպարեզում մի նոր հոգևոր վերածնունդ ու կենսանորոգ տարերք, խաղաղ երկինք ու նոր օրերի արշալույսի բեղմնավոր և լուսավոր ճանապարհ:
Նատաշա Պողոսյան