Թանգարանների միջազգային օրն Արցախի մշակույթի զարգացմանը, հայրենի երկրի ճանաչմանն ու գիտելիքների խորացմանն էր ուղղված |Շուշիում կազմակերպված պատանի բնախույզների հավաքը և այցելությունը Գ. Գաբրիելյանցի անվան երկրաբանության պետական թանգարան: Այդ օրը` մայիսի 18-ին, անցկացվեց «Պատանի բնագետ» հանրապետական երկրորդ «Բրեյն-ռինգ» ինտելեկտուալ խաղը, որին ներկա էր նաև երկրի նախագահ Բ. Սահակյանը:
Մասնակից տասը թիմերի մեջ էին Մարտակերտի Վլ. Բալայանի անվան միջնակարգ դպրոցի 10-րդ դասարանի աշակերտները` խմբի ղեկավար, աշխարհագրության ուսուցչուհի Նունե Գասիյանի հետ, ովքեր հանդես եկան «Ջրաբերդ» թիմում և հաջողություն գրանցեցին` զբաղեցնելով 2-րդ մրցանակային տեղ: Ստացած պատվոգիրը, վկայականները, ճամբարում հանգստանալու ուղեգրերն ու նվերները, նաև նրանց բարձր տրամադրությունը, որ փոխանցվեց բոլորիս, դարձան այդ հաղթանակի լավագույն գրավականը, որի մասին արտահայտվեցին ինտելեկտուալ խաղի` մեր դպրոցի մասնակիցներն իրենց խոսքերում:
Առուշանյան Նորայր - «Մեր ուսուցչուհի տիկին Գասիյանը կարողացավ ժամանակին թիմ ձևավորել և նպատակային աշխատանք տանել մեզ հետ, որի արդյունքում կարողացանք հաջողության հասնել: Մենք նպատակ ունեինք հաղթելու. դա սկզբից էլ արտահայտվեց մեր մարտական բարձր տրամադրությամբ: Առաջին փուլում գերազանց մասնակցություն ունեցանք, ուղղակի անթերի պատասխանեցինք բոլոր տասը հարցերին: Սակայն երկրորդ փուլում չկարողացանք ապահովել «տրիումֆային» առաջին տեղը: Մեր թիմն արժանացավ գեղեցիկ քարից պատրաստված արձանիկի, որը նվիրեցինք մեր ուսուցչուհուն, իսկ ակտիվ մասնակցության համար շնորհեցին մեզ լավագույն քարից պատրաստված բուրգ և ճամբար գնալու ուղեգիր, որը մեզ շատ ուրախացրեց: Ես մինչ այդ մասնակցել էի աշխարհագրության օլիմպիադային, տեսա, որ գիտելիքներս օգնեցին նաև այս մրցույթի ժամանակ»:
Ավագիմյան Գոռ – «Մենք նպատակ ունեինք լավ խաղ ցույց տալ, որը մեզ մոտ ստացվեց: Մրցույթն սկսվելուց առաջ ինձ մոտ լարվածություն կար, որն առաջին փուլում անցավ, երբ բոլոր հարցերին պատասխանեցինք: Այս հաղթանակի համար շնորհակալ ենք մեր ուսուցչուհուն, մենք արժանացանք պատվոգրի, գրքերի, մեզ նվիրեցին փարավոնի քանդակով արձանիկ, ուղղակի շնորհակալ եմ բոլոր կազմակերպիչներին` այս գեղեցիկ միջոցառման համար»:
Այվազյան Լիլիթ – «Այս ուսումնականում մասնակցելով աշխարհագրության օլիմպիադայի եզրափակիչ փուլին` մեծ փորձ ձեռք բերեցի: Մրցույթից առաջ մեծ լարվածություն կար, բայց մեր ուսուցչուհին քաջալերում էր մեզ: Սկզբում այցելեցինք երկրաբանական թանգարան և մեծ բավականություն ստացանք: Այնուհետև գնացինք կերպարվեստի թանգարան, որտեղ ջերմ մթնոլորտ էր, և այնտեղ էլ անցկացվեց մրցույթը: Մեր հաղթանակը մեծ ոգևորությամբ նշեցինք. դա մեր ուսուցչուհու և թիմի անդամներիս աշխատանքի շնորհիվ էր, շնորհակալություն բոլորին` մեզ այսպիսի բավականություն պարգևելու համար»:
Գրիգորյան Նորա – «Ամեն ինչ բարձր մակարդակով էր կազմակերպված, և ամենաշատն ինձ դուր եկավ երկրաբանության թանգարանը: Սկզբից էլ այն զգացողությունն ունեի, որ մենք պիտի հաղթենք: Այդտեղ մեծ օգնություն էր աշխարհագրության մեր իմացությունը: Ողջունելի է, որ մենք կարողացանք գրավել մրցանակային տեղ, տա՛ Աստված, որ մյուս տարի ավելի բարձր ցուցանիշ գրանցենք»:
Ղահրամանյան Տաթև - «Բավականին հաճելի էր, որ մեր թիմը համախմբված էր, և թեժ մրցակցություն ընթացավ: Կարող էինք գրավել առաջին պատվավոր հորիզոնականը, բայց երկրորդ փուլի երկու հարցում թերացանք: Իսկ տասնօրյա ճամբարի հանգստյան ուղեգիրը մեծ խանդավառությամբ ընդունեցինք»:
Կարապետյան Քրիստինե – «Մինչև մրցույթի սկսվելը շատ լարված էի, բայց մեր ուսուցչուհու շնորհիվ և առաջին փուլում գրանցած բարձր միավորների արդյունքում` լարվածությունս գրեթե անցավ: Հպարտ և ուրախ եմ, որ այսպիսի հնարավորություն ընձեռվեց և կարողացանք պատմական Շուշիում նման հաղթանակ արձանագրել»:
Այս հաղթական տրամադրությամբ ոգևորված` հիացմունք եմ ապրում և շնորհավորում մեր աշակերտներին ու իմ գործընկեր ուսուցչուհուն: Եվ թվում է` կարիք չկա հարցնել թիմի ղեկավար Ն. Գասիյանին իր ապրած զգացողության մասին, երբ տեսանելի է նրա աշխատանքի արդյունքը, բայց ուսուցչուհու խոսքում հուզմունք կար, մեծ գոհունակություն, որ գալիս էր հաստատելու այն մեծ ճշմարտությունը, որ գիտելիքը ուժ է, իսկ հայրենի երկրի ճանաչողությունը` մեծ հաղթանակ:
Նատաշա Պողոսյան