ՀՀ փոքր ՀԷԿ-երի միության նախագահ Նաիրա Նահապետյանը Slaq.am-ի հետ զրույցում ներկայացրեց ՀԷԿ-երում առկա խնդիրների և առաջիկայում կատարվող աշխատանքների մասին:

Մի փոքր կպատմեք ՀԷԿ-երի գործունեության մասին, ինչպիսի՞ ֆինանսական և տեխնիկական խնդիրներ կան այժմ:

Փոքր ՀԷԿ-երի սեփականաշնորհման գործընթացը սկսվել է 1996 թվականին: Խորհրդային միության տարիներին Հայաստանում շահագործվում էր 13 փոքր հիդրոէլեկտրակայան,անկախացումից հետո մեծ թափով սկսեցին կառուցվել նոր ՀԷԿ-եր, և այսօր նրանց թիվը հասնում է 220 - 230-ի, որից 180 հիդրոկայան շահագործվում է , 45 կայան լիցենզավորվել են , սակայն դեռ չեն շահագործվել` շինանարության ընթացքի մեջ են: Վերջին 3-4 տարիները ՀԷԿ-երի համար բավականին ծանր էին , քանի որ սակավաջրության խնդիր կար, այդ իսկ պատճառով շատ հիդրոկայաններ չէին կարողանում աշխատել և հայտնվեցին ծանր կացության մեջ:

2015 թվականին ՀԷՑ-ը չէր կարողանում ՀԷԿ-երին ունեցած պարտքը մարել, արդյո՞ք այդ գումարներն արդեն վճարվել են և ինչքա՞ն էր այն կազմում:

2015 թվականի հունվարից փոքր հիդրոկայանների վիճակն էլ ավելի ծանրացավ, քանի որ ՀԷՑ-ի կողմից գնված արտադրանքի դիմաց կատարվող վճարումները դադարեցվեցին, որը տևեց համարյա 3 ամիս, ինչն էլ բերեց կոլապսի : Հիդրոկայաններում առաջացան աշխատավարձերի վճարումների , բանկային և հարկային պարտավորությունների հետ կապված ֆիանանսական խնդիրներ: 
Այդ ամիսներին խնդրի կարգավորման գործում բավականին մեծ դերակատարում ունեցավ ՀՀ Էներգետիկայի և բնական պաշարների նախարար Երվանդ Զախարյանը : Միությունը ամենօրյա աշխատանքային կապի մեջ էր Նախարարի հետ , նաև բանակցություններ էր տարվում ՀԷՑ-ի տնօրինության հետ: Շարունակական բանակցությունների արդյունքում, ՀՀ նախագահի «Ինտեր ՌԱՕ ԵԷՍ»-ի գլխավոր տնօրենի հետ հանդիպումից հետո , որտեղ քննարկվել էին էներգետիկ ճգնաժամից դուրս գալու հարցերը , արդեն ապրիլի 1-ից ՀԷՑ-ի կողմից սկսվեցին գոյացած պարտքերի վճարումները : 
ՀԷՑ-ի պարտքը Փոքր ՀԷԿ-երին կազմում էր 1,2 մլրդ դրամ, որը ավելանում էր յուրաքանչյուր ամիս` գնված արտադրանքի դիմաց : Այսպիսով, ՀԷՑ-ը ՀԷԿ-երին ունեցած ամբողջ պարտքը կարողացավ մարել 3 ամսվա ընթացքում : 
Կուտակված պարտքերի մարումը ՀԷՑ-ում առաջացրեց որոշակի ֆինանսական ճգնաժամ , որը խորացրեց ՀԷՑ-ում առկա ֆինանսական խնդիրները :

Ինչպե՞ս ավարտեցիք էներգետիկ համակարգի համար այդքան ծանր տարի համարվող 2015 թվականը:

Կարող եմ ասել, որ տարին ավարտեցինք առանց ցնցումների և այժմ ՀԷՑ-ի կողմից գնված արտադրանքի դիմաց վճարումները կատարվում են ժամանակին :
2016 թվականի կանխատեսումները բավականին հուսադրող են, տարին պետք է որ ջրառատ լինի : 
Պետք է նշեմ, որ 2015թ-ին սակագնի թանկացումը , որը բավականին ծանր էր ազդել սպառողի վրա, սուբսիդավորվում է կառավարության կողմից` որոշակիորեն մեղմելով սպառողի բեռը:

Ինչպե՞ս եք գնահատում Էներգետիկայի և բնական պաշարների նախարար Երվանդ Զախարյանի աշխատանքը:

Ես մոտ 22-23 տարի է` աշխատում եմ այս բնագավառում, կարծում եմ` Երվանդ Զախարյանը շատ կոնստրուկտիվ է աշխատում, այսինքն` յուրաքանչյուր հարց մենք կարողանում են քննարկել նրա հետ, նա միշտ հասանելի է, որը շատ կարևոր է նախարարի համար: Եվ պետք է նշեմ, որ այն ծանր ամիսներին, երբ ֆինանսական բավականին մեծ խնդիրներ կային, մենք կարողանում էինք գրեթե ամեն օր նրա հետ աշխատել, ինչի շնորհիվ կարողացանք այդպիսի ծանր վիճակից դուրս գալ:Իսկապես, հետևանքները շատ բարդ կարող էին լինել , եթե պետությունը, կառավարությունը և նախարարը ճիշտ լուծումներ չտային:

Սամվել Կարապետյանի ՀԷՑ-ը գնելուց հետո ինչպիսի՞ փոփոխություններ եք նկատում էներգետիկ համակարգում:

Դրական տեղաշարժն ունեինք արդեն 2015 թվականից: Սամվել Կարապետյանը տարվա վերջին դարձավ ՀԷՑ-ի սեփականատեր, նշանակվել է ՀԷՑ-ի նոր տնօրեն` Կարեն Հարությունյանը, ով այս համակարգում աշխատել է երկար տարիներ և բավականին պրոֆեսիոնալ է :