Ընտրություններն այլևս պատմություն են, ինչը թույլ է տալիս մեզ ոչ թե վերլուծություններ անել` կռահելով կամ ենթադրություններ անելով, այլ` հիմնվելով իրական փաստերի վրա, իսկ փաստերն առավել քան խոսուն են ու հակառակ ռացիոնալիզմի բոլոր օրենքների:
ՀՀԿ-ն, որը բազմիցս է շեշտել Հայաստանի ներկա վատթար վիճակի համար իր` գլխավոր պատասխանատու լինելու հանգամանքն` այդպիսով ակամա հաստատելով,որ հենց ինքն է պատասխանատվություն կրում երկրում ստեղծված ծանր սոցիալ-տնտեսական վիճակի համար ու հիմքն է հանդիսանում տոտալ հուսալքության, տարել է տառացիորեն շռնդալից հաղթանակ` հավաքելով ավելի քան 49% ձայն:
Այսպիսով` Հանրապետական կուսակցությունը ապրիլի 2- ին կայացած խորհրդարանական ընտրությունների արդյունքներով 6- րդ գումարման Ազգային ժողովում կունենա 55 պատգամավորական տեղ այն պարագայում,երբ Ազգային ժողովում պատգամավորների ընդհանուր թիվը կազմելու է 105 հոգի:
Համաձայնե՛ք` անկրկնելի արդյունք մի քաղաքական ուժի համար, որը հասարակության մեջ բացի թալանից ու անօրինությունից` ուրիշ ոչ մի բանի հետ չի ասոցացվում:
Բնական հարց կարող է առաջանալ ցանկացած մտածող մարդու մոտ` ինչպե՞ս է այս ամենը հնարավոր:
Պատասխանն առավել քան պարզ է: ՀՀԿ-ն երբեք չէր ունենա նման արդյունքներ, եթե գործի չդներ իր տրամադրության տակ գտնվող վարչական ու ֆինանսական լծակները. միայն պետական կառույցներն ու դրանց հետ այսպես թե այնպես կապ ունեցող մարմինների ու գերատեսչությունների աշխատակիցները` սեփական ընտանքներով, բավարար էին,որպեսզի ՀՀԿ-ն հաղթած ճանաչվեր: Սրան էլ երբ գումարում ես տոտալ ընտրակաշառատվությունն ու այլ գործիքակազմերը, պատկերն առավել քան հասկանալի ու ընկալելի է դառնում:
Անկասկած է, սակայն,որ ոչ մի այլ գործոն այնքան շատ չի շահարկվել ու չարաշահվել Հանրապետականի կողմից,որքան ընտրակաշառքը:
Այն,որ այս խորհրդարանական ընտրություններն աչքի էին ընկնելու բնակչությանը տոտալ կաշառատվությամբ,ոչ ոք չէր կասկածում,բայց քչերը կարող էին պատկերացնել այս ամենի իրական մասշտաբները:
Իսկ ժողովուրդը, որ աղքատության ու կարիքի մեջ մի կերպ գոյատևում է,ուղղակի զուտ ֆիզիկապես ընդունակ չեղավ դիմանալու գայթակղությանն ու փաստացի վաճառեց իր ձայնն`այդպիսով փաստելով Հայաստանում ներդրված խայտառակ կառավարման մեխանիզմի գործուն լինելու հանգամանքը:
Ակնհայտ է`իշխանություններին բացարձակապես ձեռնտու չէ լավ ապրող, հետևաբար և մտածող մարդկանցով բնակեցված Հայաստան ունենալը:
Շատ ավելի ձեռնտու է ունենալ հացին կարոտ ու հնդկական սերիալներով սնվող ազգաբնակչություն, քան 21-րդ դարի մտածելակերպով անհատներ, իդիվիդումներ,որոնց ամեն մեկի հետ հարկ կլիներ առանձին աշխատանք տանել`համոզելու սեփական ճշմարտացիության մեջ:
Ընտրակաշառքի մեխանիզմն իրականում կատարյալ հայտնագործություն է ու ոչ ոք, վստահաբար, առաջիկայում այն չի պատրաստվում չեղարկել:
Հանրապետականի իշխանությունը Հայաստանում տիրելու է հավետ, ու թող մեկը փորձի այս պնդումը կասկածի տակ առնել՝ աչքերը կհանեն…
Ալեքսանդր Գրիգորյան