Կոնգրես-ՀԺԿ դաշինքի առաջնորդ, ՀՀ առաջին նախագահ Լևոն Տեր-Պետրոսյանի հարցազրույցը Հանրային հեռուստաընկերության «Օրակարգից դուրս» հաղորդաշարին  նոր մոտեցումների առումով օրիգինալ չէր: 

Տեր-Պետրոսյանը առավելապես խոսում էր ղարաբաղյան հարցի կարգավորման իր հայտնի մոտեցումների մասին և ըստ էության կրկնեց այն, ինչ  բազմիցս արդեն ասել էր: Պարտվողական հայտնի մոտեցումների  արտահայտման մեջ նորությունը թերևս մի քանի ձևակերպումներն էին:

Դրանցից ամենաուշագրավը   ՀՀ առաջին նախագահի խոստովանությունն  էր, որ  ինքն օկուպանտ նախագահ է՝ միջազգային իրավունքի տեսանկյունից: Նա այս մասին հայտարարեց բառացի. լրագրողի ճշտող հարցին՝ Դուք էիք այն ժամանակ նախագահը, Դուք օկուպացիա՞ էիք արել, նախագահը պատասխանեց.«Այո՛»: Քիչ անց Լևոն Տեր-Պետրոսյանը վերախմբագրեց ինքն իրեն, հայտարարելով, որ ազատագրված տարածքների համար  ամենաճիշտ տերմինը սա է. Ղարաբաղի վերահսկողության տակ գտնվող ադրբեջանական տարածքներ:

Երկու դեպքում էլ, իհրակե, ասոցացիան շատ տխուր է, երբ քո երկրի հիմնադիր նախագահը, ում օրոք հայկական տարածքները ընդլայնվել են, վախենում է այս մասին խոսել իբրև հաղթանակի և տերմիններ է հնարում, որ չօգտագործի ազատագրված հայկական հողեր բառակապակցությունը…. Սա Լևոն Տեր-Պետրոսյանի պատմական մոտեցումն է, դրա մասին շատ է խոսվել ու գրվել, հավանաբար դեռ էլի կխոսվի ու կգրվի:

Հաշվի առնելով, որ հարցազրույցը նախընտրական էր, առաջնային ակցենտն այս փուլում, բնականաբար,  դառնում է  քաղաքական անթաքույց համակրանքը, որը Լևոն Տեր-Պետրոսյանն արտահայտում էր գործող նախագահի և իշխանության նկատմամբ:

 Վաղուց անցել են այն ժամանակները, երբ Լևոն Տեր-Պետրոսյանը հրապարակավ Սերժ Սարգսյանին ու նրա ղեկավարած իշխանությանը անվանում էր  հանցավոր ռեժիմ, ավազակապետություն, որի բուրգը պետք է կազմաքանդել: Այլևս անցյալում են նաև բուրժուադեմոկրատական հեղափոխության ժամանակները,  երբ Տեր-Պետրոսյանի հույսն ու քաղաքական հենարանը Գագիկ Ծառուկյանն էր:

Հիմա արդեն Լևոն Տեր-Պետրոսյանի միակ ապավենը  Սերժ Սարգսյանն է:

Ըստ առաջին նախագահի՝ ապրիլի 2-ի խորհրդարանական ընտրություններին մասնակցող քաղաքական բոլոր ուժերը պետք է պատասխանեին ընդամենը մեկ, իր կարծիքով ամենակարևոր հարցին. համաձա՞յն  են ԼՂՀ խնդրի կարգավորման  միջազգային միջնորդների կողմից առաջարկված տարբերակին, որի շուրջ այսօր բանակցում են ՀՀ իշխանությունները. «Մենք հայտարարում ենք, որ համաձայն ենք»,- նշեց Տեր-Պետրոսյանը՝ հավելելով, որ իրենցից բացի միակ ուժը, որն այս հարցի մասին իր նախընտրական ծրագրում դրական է   արտահայտվել ՀՀԿ-ն է: «Մնացած բոլոր ուժերին, ովքեր ԼՂՀ հարցին չեն ցուցաբերել կոնկրետ մոտեցում,  չեն ասել այո կամ ոչ, պետք է գնալ և դեմ քվեարկել»,- գտնում է Կոնգրես-ՀԺԿ դաշինքի առաջնորդը:

Փաստորեն Լևոն Տեր-Պետրոսյանն առաջարկում է քվեարկել Սերժ Սարգսյանի և ՀՀԿ-ի օգտին:

Սա նրա հարցազրույցի ամենակարևոր մեսիջն էր:

 Հայկ Դավթյան

hayeli.am