«Օհանյան-Րաֆֆի-Օսկանյան» դաշինքի առաջին համաժողովից հետո  պաշտպանության նախկին նախարար Սեյրան Օհանյանը, անդրադառնալով սահմանային վերջին լարված միջադեպերին, հայտարարել է, որ ինքը տեղեկություն ունի, որ զինված ուժերն ամբողջությամբ կատարել են իրենց առջև դրված խնդիրները. «Այս վերլուծությունը ևս մեկ անգամ ցույց է տալիս, որ բանակը ամենակայացած կառույցն է»,- հայտարարել է նախկին նախարարը:

Մինչ այս իր ելույթում նա նշել էր նաև, որ բանակը, ինչպես յուրաքանչյուր կենդանի օրգանիզմ, խնդիր ունի էլ ավելի կատարելագործվելու. «Այո, մենք այսօր կարիք ունենք նոր, ժամանակակից սպառազինությունների ձեռքբերման: Ես որոշեցի մտնել քաղաքականություն, քանի որ ՀՀ զարգացման հնարավորությունները սպառվել են: Ստեղծվել է մի իրավիճակ, երբ կա՛մ պետք է գիտակցենք իրավիճակի լրջությունը և դիմենք քայլերի, կա՛մ կկանգնենք իրական աղետների առաջ»:

Իր ելույթում Ս. Օհանյանը հայտարարել է, որ հաղթելու դեպքում իրենք առաջիկա երեք տարիների ընթացքում պայմանագրային զինծառայողների թիվը ավելացնելու են. «Մարդակենտրոն աշխատանքն ու կոռուպցիայի դեմ պայքարը դրվել են պլանային հիմքերի վրա:

Առաջին երեք տարում ավելացնենք պայմանագրային ծառայողների թիվը ու նրանց աշխատավարձը դարձնել 240 հազար դրամ: Սրանով նաև կավելացնենք զինվորական ծառայության գրավչությունը»,- ասել է Սեյրան Օհանյանը և հավատացրել, որ ինքը պաշտոնի կռիվ չի տալիս.- չեմ թաքցնում՝ ինձ առաջարկվել են բազմաթիվ տարբեր պաշտոններ, որոնցից ես հրաժարվել եմ։ Իմ կյանքի ամենաբարձր և պատվաբեր պաշտոնը դեռևս 25 տարի առաջ առաջին գծի խրամատում մարտնչելն էր զինվորի ու հասարակ ժողովրդի կողքին»:

Սեյրան Օհանյանի խոսքերն անշուշտ իրավացի են, դրանցով կարելի էր անկեղծ հիանալ, եթե այդ մոտեցման հեղինակլը նախկին պաշտպանության նախարարը չլիներ:

Պայմանագրային զինծառայողների թիվը, այո, պետք է ավելացնել, ինչպես նաև բարձրացնել նրանց աշխատավարձը:

Այս մասին բազմիցս խոսվել է: Ավելին՝ կա շատ հստակ մոտեցում՝ առաջին գծի պաշտպանությունը ամբողջությամբ պայմանագրային զինծառայողներով իրականացնելու մասով. այս դեպքում ժամկետային ծառայությունը մեր բանակում չի դիտվի որպես 18 տարեկան երիտասարդին մահվանն ընդառաջ ուղարկելու ռիսկ, կնվազեն բանակից ամեն գնով խուսափելու դեպքերը, կնվազի նաև կոռուպցիան զինված ուժերում և դրան հարակից այլ ոլորտներում:

Վերջապես կնվազի հանրային սթրեսը: Ի վերջո կարելի է կազմել պրոֆեսիոնալ և շատ լավ պատրաստված առաջնապահ զորամիավորում՝ բացառապես  պայմանագրային զինծառայողներով՝ նրանց ապահովելով պատշաճ վարձատրություն, իսկ արդեն երկրորդ գծից սկսած՝ հայրենիքի պաշտպանությունը թողնել ժամկետային զինծառայողի վրա:

Սրանք շատ հայտնի ճշմարտություններ են, որոնց մասին բազմիցս է խոսվել և շատ վացուց: Ի՞նչն էր խանգարում Սեյրան Օհանյանին՝ ավելացնել պայմանագրային զինծառայողների թիվը, օրինակ, մեկ-երկու կամ 5 տարի առաջ, երբ նա պաշտպանության նախարար էր: Եթե բանակի բյուջեն ուներ նման հնարավորություն, ապա Օհանյանը սա կարող էր հանգիստ անել, իսկ եթե նման հնարավորություն այն ժամանակ չի եղել, պարզ է, որ այդ հնարավորությունը չկա նաև այսօր, հետևաբար ի՞նչ իմաստ ունի նման պոպուլիստական խոստում տալ այսօր:

Ի վերջո, ոչ ոք չի մոռացել՝ ինչ էր խոսում Սեյրան Օհանյանը մի տարի առաջ, և ինչ էր կատարվում բանակում: Եթե անգամ ընդունենք, որ բոլոր խնդիրների համար նախարարին մեղադրելը արդարացված մոտեցում չէ, սակայն ամեն դեպքում նախարարն այս համակարգի պատասխանատուն է եղել:

 Արման  Վարդանյան

hayeli.am