Ձերբակալվել է Երևանի Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը: Մեր տեղեկություններով, նա կասկածվում է կաշառք վերցնելու մեջ:

Իրավապահ մարմինները դեռեւս պաշտոնապես չեն հաստատում տեղեկությունը, բայց նաեւ չեն հերքում: ԱԱԾ լրատվական ծառայությունից armtimes.com-ին հայտնեցին, որ ձերբակալության մասին պաշտոնական տեղեկատվություն կարող են հայտնել միայն առավոտյան:

Իրավապահ շրջանակներից մեզ փոխանցեցին, որ Իշխան Խաչատրյանին Ազգային անվտանգության ծառայությունը ձերբակալել է այսօր երեկոյան, փողոցում, Շենգավիթ վարչական շրջանում: Նույն շրջանակներից հայտնում են, որ Բարսեղյանը ինչ-որ քաղգործով կաշառք է վերցրել եւ հենց նույն պահին էլ ԱԱԾ-ն նրան ձերբակալել է: Ընդ որում, խոսքը շատ փոքր գումարի մասին է՝ 500-1000 դոլար: Քրեական օրենսգրքի 311 հոդվածի 4-րդ մասով նրան սպառնում է 7-2 տարվա ազատազրկում:

Մեր աղբյուրները հայտնում են նաեւ, որ ձերբակալված դատավորը շատ լուրջ անձնական խնդիրներ է ունեցել. նա վարկեր է ունեցել, կորցրել է տունը, բաժանվել ընտանիքից, ապրում է վարձակալած բնակարանում:

Իշխան Բարսեղյանը ծնվել է 1965 թվականին Սևան քաղաքում։ 1982 թվականից մինչև 1987 թվականը սովորել է ԵՊՀ իրավաբանական ֆակուլտետում։ 1987 թվականից մինչև 1992 թվականն աշխատել է Ղափանի միջշրջանային դատախազությունում՝ որպես քննիչ։ 1992 թվականից մինչև 1996 թվականն աշխատել է Սևանի միջշրջանային դատախազությունում՝ որպես քննիչ։ 1996 թվականից մինչև 1999 թվականն աշխատել է Հրազդանի շրջանային ժողդատարանի դատավորի պաշտոնում։ 1999 թվականից առ այսօր աշխատում է Շենգավիթ վարչական շրջանի ընդհանուր իրավասության դատարանի դատավոր։

2015 թվականի հունիսին «Հրապարակ» թերթի թղթակցի եւ դատավոր Իշխան Բարսեղյանի միջեւ տեղի է ունեցել այսպիսի հարցուպատասխան.

- Դուք տեղյա՞կ եք, որ Ձեր մասին լուրեր են շրջանառվում, թե, իբր, կազինոներում եք խաղում, Ձեր վարքագիծն են քննարկում։

- Հարգելիս, ես եվրոպական տարբեր քաղաքներում եմ եղել, այդ թվում՝ նաեւ երկու անգամ Բադեն-Բադենում։ Որպես տղամարդ եւ երեք երեխաների հայր, նաեւ աստվածապաշտ մարդ, երդվում եմ, կյանքում եթե գեթ մեկ անգամ, ուղղակի հետաքրքրության համար մտել եմ նման հաստատություն, թող Աստված այնպես անի, որ երեք երեխաներիս չտեսնեմ։ Ես կռվի մասնակից եմ, 4 վիրահատություն եմ կատարել, Ղափանի կենտրոնում ունեցել եմ բնակարան, որը նվիրել եմ իմ ընկերոջը, անբարոյական համարելով վաճառել այն։ Ես կարող եմ վստահեցնել, որ սրբությամբ կատարել եմ իմ աշխատանքը՝ 28 տարի։ Հարամություն չեմ արել։

2015-ին ՀՀ դատավորների ընդհանուր ժողովի էթիկայի եւ կարգապահական հարցերի հանձնաժողովը դիմել էր արդարադատության խորհուրդ Բարսեղյանի նկատմամբ կարգապահական վարույթ հարուցելու համար: Ըստ Էթիկայի հանձնաժողովի. «Ի.Բարսեղյանն արդարադատություն իրականացնելիս կոպիտ անփութությամբ, քանի որ դատավորը տվյալ իրադրությունում կարող էր եւ պարտավոր էր կանխատեսել իր վարքագծի ոչ իրավաչափ բնույթը, թույլ է տվել դատավորի բարձր կոչման հետ անհամատեղելի նյութական եւ դատավարական նորմերի պարբերաբար կատարված այնպիսի խախտումներ, որոնց առկայությամբ չի կարող կասկածի տակ դրվել որեւէ ողջամիտ իրավական ենթադրությամբ կամ փաստարկով»: 

Արդարադատության խորհուրդը կարճել էր Բարսեղյանի դեմ հարուցված գործը, նրան պատասխանատվության ենթարկելու դիմումի ժամկետները հանձնաժողովի կողմից չպահպանելու հիմքով:

Բայց ահա, 2013-ին Իշխան Բարսեղյանին ԱԽ-ն հայտարարել է նկատողություն` զուգորդված 6 ամիս ժամկետով աշխատավարձի 25 տոկոսից զրկելով:armtimes.com