Ջհանգիր Լֆիկյան

 15- ավելի մեծ է, քան 18-ը

 Վանաձորի քաղաքապետ ընտրվեց Հայաստանի Հանրապետական կուսակցության ցուցակը գլխավորող Մամիկոն Ասլանյանը: Նա գաղտնի քվեարկության արդյունքում ստացավ 19 ձայն, և սա՝ այն դեպքում, երբ ՀՀԿ-ն ավագանու ընտրություններից ուներ ընդամենը 13 մանդատ ու մեկն էլ դաշնակներից էր փոխ առել: Ընդդիմության երեք քաղաքական ուժեր՝ «Լուսավոր Հայաստանը», «Հայկական վերածնունդը», «Բարգավաճ Հայաստանը», ձեռքի տակ ունենալով ավագանու 33 տեղերից 18-ը, խայտառակ պարտություն կրեցին:

Ասում ենք խայտառակ ու ամոթալի, որովհետև ծախվածությունն ու դավաճանությունը գեղեցիկ մակդիրներով չես պճնի: Իսկ որ 4 հոգի հենց այդ գնով էլ անցել են մրցակցի բանակը, կասկածից վեր է: Հիմա բոլորը խոսում են այն մասին, թե ՀՀԿ-ն սպառնալիքների, շանտաժի ու չգիտեմ թե ուրիշ էլ ինչ առևտրային առնչությունների միջոցով կարողացավ իր կողմը տանել դեռևս անհայտ ու անանուն 4 մարդու: Բայց քչերն են ցանկանում արձանագրել նաև, որ շատ դժվար բան է գնել մարդուն, եթե նա չի ցանկանում ծախվել:

Վանաձորյան ընտրությունները մեկ անգամ ևս փաստեցին, որ եթե իշխանությունները շարունակում են ընտրությունների կազմակերպման ու կայացման հին ավանդույթը, ապա ընդդիմությունն էլ իր հերթին մնում է նախկինի նման անվստահելի ու կասկածելի: Նրանց ներսում նստած Տրոյական ձին յուրաքանչյուր պահի կարող է վերածվել ռեալ վտանգի հենց իրենց համար՝ ներսից կազմաքանդելով յուրաքանչյուր միավորում: Ու եթե այսօր «Լուսավոր Հայաստանը» հիմքեր ունի կասկածելու ԲՀԿ-ականներին ու ՕԵԿ-ականներին, ապա ո՞վ կարող է վստահաբար պնդել, թե դավաճանները հենց Մարուքյանի կուսակցության շարքերից չէին:

Հետգրություն

Իսկապես որ, Հայաստանի բոլոր ժամանակների ընդդիմությունը միշտ ավելի այլանդակ է եղել, քան իշխանությունը, և Վանաձորի այսօրվա փաստը կրկին ապացուցեց դա։

shame.am