Orer.am-ը, շարունակելով իր ընթերցողներին ներկայացնել պատգամավորների կարծիքով 2015 թվականի հաջողություններն ու ձեռքբերումները, ինչպես նաեւ բացթողումները, այս անգամ զրուցել է ԱԺ ՀՀԿ խմբակցության ղեկավար Համլետ Հարությունյանի հետ, ով, խոսելով կապիկի տարու մասին, զուգահեռ անցկացնելով կենդանակերպի նշանի ու քաղաքական գործիչների միջեւ, ասաց.

«Քաղաքական գործիչների մեծ մասը կապիկ է, քաղաքականությունը մի բնագավառ է, որտեղ կապիկությունն անհրաժեշտ պայման է: Կապիկն էլ է էդպես մարդանման, բայց մարդ չէ: Ե´ւ ընդդիմության, ե´ւ դիմության մեջ կապիկանման գորժիչներ կան»:

ՀՀԿ-ական պատգամավորը, անցում կատարելով տարին ամփոփելու թեմային, ասաց, որ որպես գրանցված հաջողություն կարող է համարել այն, որ Ցեղասպանության 100-ամյակի միջոցառումները, որոնք համաշխարհային նշանակություն ունեցան, «ցնցեցին աշխարհը»:

«Ոչ թե որպես բացթողում, այլ պարզապես որպես ցանկություն կարող եմ ասել, որ կուզեի, որ սոցիալական բնագավառում եկող տարի մենք մեծ հաջողություններ ունենանք: Ցանկանում եմ, որ սոցիալական խնդիրները լուծվեն, որ մյուս տարի այս ժամանակ ես հաջողությունները թվարկելիս խոսեմ նաեւ տնտեսական այն տեղաշարժերից, որոնք գրանցվել են 2016 թվականին»,- ասաց պատգամավորը:

Հ.Հարությունյանի համար ամենամեծ ցանկություններից մեկը խաղաղությունն է, որը ցանկանում է տեսնել հայ-ադրբեջանական սահմանին:

«Գալիք տարի պետք է բանակ մեկնեն իմ երկու թոռները, բնականաբար, իմ եւ բոլորիս առաջին ցանկությունն այն է, որ խաղաղություն լինի, որ սահմաններին այլեւս երեխաներ չզոհվեն, որ ի վերջո խաղաղություն լինի մեր օջախներում:

Ճիշտ է, գիտենք, որ այսօր խաղաղությունը պահպանվում է, սակայն դա փխրուն խաղաղություն է, ես կուզեի, որ ամեն ինչ ավելի հստակ լիներ»,- նկատեց պատգամավորը՝ հավելելով, որ թեպետ Ամանորի օրերին սահմանին վիճակն ավելի է սրվում, բայց, ինչպես ամեն տարի, այս անգամ եւս Նոր տարին անցկացնելու է ԼՂՀ սահմանամերձ Ճարտար գյուղում՝ հայրական օջախում:

Սոսե Չանդոյան