Զարմանալի ժողովուրդ են ամերիկացիները: Նորից դատարկ բանի համար հայի են ձերբակալել: Ասում են, թե Կալիֆոռնիա նահանգի Ռանչո Կորդովա քաղաքի տներից մեկում, որտեղ ապրել է մեր հայրենակից Խաչատուր Ավդալյանը, ոստիկանները հայտնաբերել են մարզական  կեղծված հագուստներով տասնյակ արկղեր: Ասում են նաև, թե հարկային տեսչության աշխատակիցները քաղաքի ոստիկանության հետ համատեղ առգրավել են հարյուրավոր մարզական պարագաներ, որոնք վաճառվել են Գալտեի շուկայում: Ավդալյանի ձերբակալությունից հետո հայտնաբերել էին նաև պահեստ, ուր պահվել է ապօրինի ապրանքը:

 

Բա այսպիսի բանի համար կարելի՞ է մարդուն մեղադրանք առաջարկել: Ժամանակն է, որ ամերիկացի օրինապահները կարողանան գիտակցել տարրական բաներ, օրինակ, այն, թե որտեղից է գալիս այդ մարդը և նրա հայրենիքում ինչպիսի բարքեր են տիրում: Այդ հասարակ ինֆորմացիան յուրացնելուց հետո ոչ մի ամերիկացու մտքով անգամ չի անցնի ձերբակալել հային կեղծիքի համար, քանի որ դա հայկական հին, բարի ավանդույթ է: Այդ դարավոր սովորույթներին ծանոթանալու համար ավելորդ չէր լինի, եթե մի խումբ յանկիներ փորձի փոխանակման կարգով ժամանեին Հայաստան: Մեր իրավապահները նրանց կուղեկցեին Արգավանդ ու Փարաքար և նրանք այնտեղ կտեսնեին, թե ինչպես են հայկական սովորական օջախներում երկրորդ կյանք ստանում համաշխարհային հռչակ ունեցող ընկերությունների արտադրանքները, ինչպես են այդ արտադրանքները հետո հայտնվում Բանգլադեշի, Հրազդանի, Ֆիրդուսու շուկաներում և իրացվում այնպես, ասես հենց բնօրինակներն են:

 

Վերջում նրանց կարելի է նաև պատմել, որ մի տարի, երբ մեր բանակին սկսեցին մատակարարել Պռոշյան սովխոզում պատրաստված «Ադիդաս» ֆիրմայի մարզական կոշիկներ, ոչ ոք չզարմացավ և նույնիսկ ոչ ոք չպատժվեց դրա համար:

 

Այնպես որ, հարգելի ամերկացիներ, ազատ արձակեք խեղճ Խաչատուրին: Վատ չէր լինի նաև, եթե ներողություն խնդրեիք պատճառած անհանգստության համար և փոխհատուցեիք նրա կրած վնասները: