Գյումրիի լրագրողների «Ասպարեզ» ակումբի նախագահ, Գյումրիի ՏԻՄ ընտրություններում «Գալա» կուսակցության ցուցակում ընդգրկված Լեւոն Բարսեղյանը «USArmenianews»-ի հետ հարցազրույցում տարակուսած էր քաղաքապետի ԲՀԿ թեկնածուի որդու մահվան առեղծվածային դեպքից:
Վարդեւան Գրիգորյանի որդին՝ Արշակ Գրիգորյանը մահացել է նախօրեին՝ գլխին ատրճանակի կրակոցի հետեւանքով: Գյումրիի բժշկական կենտրոն տեղափոխվել է արդեն ծայրահեղ ծանր վիճակում, եւ երիտասարդի կյանքը փրկել չի հաջողվել: Քրեական գործ հարուցված է ոչ թե սպանության, այլ «ինքնասպանության հասցնելու» հոդվածի հատկանիշներով:
«Արշակն իմ որդու դասընկերն էր, շատ պարկեշտ ու հարգված անձնավորություն: Նրա մասին որեւէ բացասական բան ասել չեմ կարող »,- նշեց Բարսեղյանը,մտավախություն հայտնելով, որ ի սկզբանե ինքնասպանության վարկած առաջ քաշելը կարող է նպաստել հանցագործության կոծկմանը:
«Տեսականորեն իրավապահները պարտավոր են նման իրադրության մեջ նաեւ այդպիսի վարկած ունենալ: Բայց եթե փորձենք տրամաբանության շրջանակներում նայել՝ առույգ, կենսախինդ երիտասարդ, քսանհինգ- քսանվեց տարեկան, երբ հայրը ընտրապայքարի մեջ է, ընտրապայքարը եռուն փուլի մեջ է, ցերեկը ժամը մեկի-երկուսի սահմանում, որոշ տեղեկություններով՝ ազգականներից մեկին է տուն կանչել, որ ինչ-որ տեղ գնան, դուրս է եկել իբր ավտոտնակ ու չի վերադարձել: Ոչ մի ձայն չեն լսել: Ելել են նայելու՝ տեսել են, որ մարդը քունքից կրակված է.սա տնեցիների պատմածն է փաստորեն:
Թե մանրամասները ինչ են, որտեղ է եղել իսկապես էդ դեպքը..…..շատ տարօրինակ է համենայնդեպս, այդպես ինքնասպան չեն լինում :Գուցե սխալվում եմ,չեմ ուզում որեւէ մեկին վիրավորել, բայց շատ տարօրինակ է նման իրադրության մեջ, նման հանգամանքներում էս ամբողջն ինքնասպանության վերագրել: Ոստիկանությունը կարիք չուներ հատկապես շեշտել ինքնասպանության վարկածը, շատ քչերն են հավատում, որ դա ինքնասպանություն է»:
« Այսինքն՝ սա ուղղորդում է ուղղակի»,- ընդգծեց «Ասպարեզ» ակումբի նախագահը,- «Իհարկե շատ հնարավոր է ,որ ցածր պրոֆեսիոնալիզմի հետեւանք է նման ռեպլիկ անելը, բայց չեմ բացառում նաեւ, որ դիտավորյալ է նման հայտարարություն արվում : Հիշեք օրինակ Քոչարյանի հայտնի հայտարարությունը Տիգրան Նաղդալյանի սպանությունից հետո, երբ հայտարարեց, որ հետքերը տանում են դեպի Դավալլու, Արարատի մարզ: Դա նշանակում է, որ այդպիսի հայտարարությունից հետո ոչ մի քննիչ կամ հետաքննիչ չէր կարող հետքերն ուրիշ տեղ որոնել: Դուք պատկերացնում եք,Քոչարյանն ասում է՝ հետքերը տանում են Դավալլու, մեկ էլ պարզվում է ՝ հետքերն իրականում ուրիշ մի քաղաքում էին…. ոչ ոք չէր համարձակվի ….»:
«Առաջիկա ՏԻՄ ընտրությունների եւ կատարվածի միջեւ որեւէ կապ հնարավոր համարո՞ւմ եք»,- հարցին,Լեւոն Բարսեղյանը պատասխանեց.
«Կապել ընտրությունների հետ կամ չկապել ՝ շատ բարդ է: Այս տեղեկատվական ծավալներով դժվար է արդյունավետ դատողություն անել»:
Կատարվածից հետո մի շարք լրատվամիջոցներում սկսեց լայնորեն շրջանառվել «զառերով» պաստառի վարկածը, թե գուցե «Գյումրեցու ոգի» նորաստեղծ կուսակցության տեղադրած պաստառը նպատակ է ունեցել ծաղրել ԲՀԿ-ի թեկնածուի սերը դեպի խաղերը, ինչից էլ որդին վիրավորվել է եւ սպանվել ենթադրյալ վիճաբանության հետեւանքով.
«Գյումրեցու ոգի» կուսակցության ներկայացուցիչն այսօր ասել է, որ իր հետ որեւէ բանավեճ, կամ վեճ կամ խոսակցություն պաստառի մասին չի ունեցել Վարդեւան Գրիգորյանի որդին: Նա հերքում է նման լուրերը, փաստորեն, ահա սա է, այլ բան ասել չեմ կարող»,- ասաց Լեւոն Բարսեղյանը:
«USArmenianews»-ի դիտարկմանը, որ «իշխանության ներկայացուցիչները եւս շտապում են կատարվածը ինքնասպանություն որակել. օրինակ, ԱԺ նախագահ Գալուստ Սահակյանը երեկ բառացիորեն հայտարարել է՝ « Ասում են ինքն իրեն մահափորձ է կատարել»» , «Ասպարեզ» ակումբի նախագահը հակադարձեց.
«Գալուստ Սահակյանի թեման քննարկելն իմ արժանապատվությունից ցածր է »:
Նյութի աղբյուրը՝ usarmenianews.com