Քոչար Օսկանյան
Նոր ձևավորվող կառավարության նպատակների, ծրագրերի և գործունեության մեթոդաբանության մասին հասարակությունը գրեթե ոչինչ չգիտի: Նույնիսկ վերջին փոփոխությունները քիչ բան են հուշում, քանի որ նոր դեմքերն այնքան էլ նոր չէին, իսկ նրանց աշխատանքի արդյունավետության աստիճանը լուրջ կասկածների տեղիք է տալիս: Եվ թերևս նաև սա է պատճառը, որ գործադիր մարմնի առաջիկա անելիքներն առայժմ գովազդում են միայն նույն գործադիրի անդամները՝ վարչապետ Կարեն Կարապետյանի գլխավորությամբ:
Ոչ ոք վաճառքի հանած իր ապրանքի մասին չի ասում, թե դա վատն է: Ոչ ոք ապագա ծրագրերի մասին վաղօրոք չի հայտարարում, թե դրանք կձախողվեն: Բայց գոնե հուշում է, թե որոնք են այն նախադրյալները, որոնց հաշվին հնարավորություն կա ինչ-որ արդյունք գրանցել: Մինչդեռ վարչապետի մոտ նույնիսկ այդ հավաստիացումների կոնկրետությունն է պակասում: Իրեն ուղղված հարցումներին նա անորոշ, վերացարկված պատասխաններ է հնչեցնում: «Կադրերը եթե փոխում ենք, ռեալ փոխում ենք, որպեսզի ինչ-որ խնդիր լուծենք... Պրոֆեսիոնալիզմով ենք առաջնորդվել»,- ասում է Կարեն Կարապետյանը՝ մտածել տալով, թե իրենից առաջ եղածներն այդքան բան չէին հասկացել ու առաջնորդվել են ոչ պրոֆեսիոնալիզմով:
Բայց ահա վարչապետին օգնության է հասնում նրա ամենասիրելի ու գնահատված կադրը, նորացվող կառավարության շարժիչ ուժ, ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը և արտաբերում է դարակազմիկ մի միտք. «Կարծում եմ, որ կարևորը գործունյա կառավարություն ունենալն է»,- ասում է նա և հետո հավելում. «Վարչապետը ձևավորում է թիմ, որով արագ կհասնի նպատակներին»:
Վաչե Գաբրիելյանն, անշուշտ, առաջինն ինքն իրեն նկատի ունի և համոզված է, որ եթե ինքը կա, ուրեմն ամեն բան արդեն լավ է լինելու: Բայց Գաբրիելյանը երևի մոռացել է, որ ինքը եղել է նաև նախորդ երկու կառավարություններում, իսկ նպատակները, չգիտես ինչու, այդպես էլ մնացին սոսկ նպատակ: Գաբրիելյանը դա հիշել չի ցանկանում: Իսկ Կարապետյանն էլ երևի դեռ չգիտի, որ այս հնացած նորերի հետ գործ ստանձնելը նույնն է, թե դատարկ գրպաններով ճամփա ընկնելը: Ու մի օր մարդիկ վարչապետին կդիմեն Թումանյանի հեքիաթային հերոսի հայտնի խոսքերով. «Դատարկ ջեբով ո՞ւր ես գնում, Փանոս ջան»:shame.am