Արդեն հայտնի է, որ ՀՀԿ-ն ՀՀ վարչապետի թեկնածու է առաջադրել Երեւանի նախկին քաղաքապետ Կարեն Կարապետյանի թեկնածությունը, որն էլ առաջիկայում կներկայացնի կառավարության իր կազմը, ապա՝ ծրագիրը:

Կարեն Կարապետյանի բիզնեսների եւ ունեցվածքի մի մասի վերաբերյալ մամուլում արդեն հրապարակումներ եղել են:

Armtimes.com-ը ներկայացնում է նրա փեսայի՝ աղջկա ամուսնու ունեցվածքը: Հիշեցնենք միայն, որ Կարեն Կարապետյանի փեսա Հայկ Հարությունյանը ՀՀ ԱԱԾ տնօրենի տեղակալ Արզուման Հարությունյանի որդին է, իսկ Արզուման Հարությունյանը ՀՀ Սահմանադրական դատարանի նախագահ Գագիկ Հարությունյանի եղբայրն է:

Եվ այսպես, Հայկ Հարությունյանը 2014 թվականից ՀՀ վարչապետի ժամանակավոր պաշտոնակատար Հովիկ Աբրահամյանի կողմից նշանակվել է ՀՀ էներգետիկայի եւ բնական պաշարների նախարարի տեղակալ: Բարձրաստիճան պաշտոնատար անձանց էթիկայի հանձնաժողովի արխիում առկա է պաշտոնը ստանձնելու օրվա դրությամբ, ապա դրան հաջորդող երկու տարիների նրա ունեցվածքի եւ եկամուտների հայտարարագրերը:

Հայկ Հարությունյանը նշանակվելու պահին ուներ 1 առանձնատուն, 1 հողամաս, Mercedes-Benz E 350 4 Matic տեսակի մարդատար տրանսպորտային միջոց: Փոխնախարար նշանակվելու ժամանակ նա ունեցել է երեք տարբեր ընկերություններում արժեթղթեր եւ այլ ներդրումներ, որոնք առանձի-առանձին կազմել են 33 հազար, 50 հազար եւ 100 հազար դրամ: Նույն ժամանակ նա 7.1 միլիոն դրամ, 3.5 միլիոն դրամ եւ 30 միլիոն դրամ փոխառություն է տվել(փոխառությունը կարող է լինել ավանդի տեսքով):

2014 թվականին նա հայտարարգրել է 19 միլիոն դրամ, 45 հազար ԱՄՆ դոլար եւ 20 հազար եվրո, իսկ եկամուտը կազմել է ընդհանուր առմամբ 120 միլիոն դրամ, որը գոյացել է ձեռնարկատիրական գործունեությամբ զբաղվելու, փոխառություններից ստացած տոկոսներից եւ աշխատավարձից: Տարվա ընթացքում նա վաճառել է իր մեքենան 17 միլիոն դրամով եւ գնել է 472 հազար դրամ արժողությամբ մի հողամաս:

Էներգետիկայի եւ բնական պաշարների փոխնախարարը, համաձայն հաջորդ տարիներին ներկայացրած հայտարարագրերի, պետական պաշտոնում նշանակվելուց հետո այլեւս ձեռնարկատիրական գործունեությամբ չի զբաղվել, գոնե փաստաթղթերով դա այդպես է:

Սակայն 2015 թվականին նա 20 միլիոն դրամով գնել է Lexus LX 570 տեսակի ավտոմեքենա, ձեռք է բերել 50 հազար դրամ արժողությամբ բաժնեմաս եւ նույն արժեքով օտարել է (հայտարարգրի այս գործարքի մասին տեղեկությունը ոչ ամբողջական է լրացվա եւ հնարավոր է անճշտություն լինի այն լրացնողի կողմից), 30 միլիոն դրամ էլ փոխառություն է վերադարձրել:

Հայկ Հարությունյանի դրամական միջոցները նախորդ տարվա սկզբում կազմել են 47 միլիոն դրամ եւ 35 հազար դոլար, որոնք հարկային տարվա վերջում դարձել են 25 միլիոն դրամ եւ 25 հազար դոլար: Կարապետյանի փեսան նախորդ տարի ստացել է մոտ 5 միլիոն դրամի եկամուտ:

Ապագա վարչապետի դուստրը՝ Մանե Հարությունյանն էլ 2015 թվականին հայտարարագրել է 15 հազար ԱՄՆ դոլար: Նույն տարում նա 20 միլիոն դրամ նվեր է ստացել, թե ումից՝ հայտարարգրում չի նշվում:

ՀՀ էներգետիկայի եւ բնական պաշարների նախարարի տեղակալ ՀԱՅԿ ՀԱՐՈւԹՅՈւՆՅԱՆ

2014 թ. եկամուտը՝ 120 մլն դրամ անշարժ գույքը՝ 1 առանձնատուն, 1 հողամաս շարժական գույքը՝ Mercedes-Benz E 350 դրամական միջոցները՝ 19 միլիոն դրամ, 45 հազար ԱՄՆ դոլար եւ 20 հազար եվրո տված փոխառությունները՝ 7.1 միլիոն դրամ, 3.5 միլիոն դրամ եւ 30 միլիոն դրամ

2014 թ. որպես փոխնախարար գնել է 472 հազար դրամ արժողությամբ վաճառել է 17 միլիոն դրամով Mercedes-Benz E 350 ավտոմեքենան

2015 թ. որպես փոխնախարար գնել է 20 միլիոն դրամով արժողությամբ Lexus LX 570 ավտոմեքենա դրամական իջոցները կազմել են 47 միլիոն դրամ եւ 35 հազար դոլար եկամուտը՝ մոտ 5 միլիոն դրամ

Փոխնախարարի կինը՝ Մանե Հարությունյանը 2015 թ.-ին ունեցել է 15 հազար ԱՄՆ դոլար