Օմբուդսմենը տիրապետում է հայերենին
Հավանաբար բոլորն են հիշում, որ կառավարության վերջերս կայացած նիստի ժամանակ, երբ վարչապետ Հովիկ Աբրահամյանը լսեց, որ Հայաստանը կրկին ՄԻԵԴ վճռի համաձայն խոշոր գումար պիտի վճարի, զայրացած ասաց, որ այդ հարցն ի վերջո պետք է կարգավորել և գտնել կոնկրետ պատասխանատուներին:

Իսկ ահա Մարդու իրավունքների պաշտպան Արման Թաթոյանը կամ տեղյակ չէ վարչապետի հորդորին, կամ մտածում է այլ կերպ: Ամեն դեպքում այսօր, կառավարության նիստից հետո, երբ լրագրողները նրանից հետաքրքրվեցին, թե ովքեր պետք է պատասխանատվության ենթարկվեն կայացված սխալ դատական ակտերի համար, որոնց դիմաց ՄԻԵԴ վճիռների ուժով պետբյուջեից գումարներ են փոխհատուցվել, օմբուդսմենն անմիջապես զարկ տվեց մեր բազմաչարչար հայոց լեզվի լայնախոհ հնարավորություններին ու արտաբերեց այսպիսի մի երկարաշունչ միտք. «Յուրաքանչյուր հարց քննության մեխանիզմ ունի: Մասնավորապես, երբ Եվրոպական դատարանի դատական ակտ է կայացվում, կա նոր հանգամանքներով վարույթ հարուցելու հնարավորություն. քաղաքացին երբ դիմում է, իր դատական ակտի հիման վրա հարուցվում է ինչ-որ անձի պատասխանատվության ենթարկելու մասին: Եթե խոսքը գնում է երկրում համակարգային փոփոխությունների մասին, դրա համար գործերի նորոգում կամ որևէ այլ մեխանիզմներ պետք չեն, այլ դրանք պետք է հիմք ընդունվեն, ուսումնասիրությունները կատարվեն»:
Այս ընդարձակ պարբերությունը լսելուց հետո հավաքվածները երեք կարևոր հետևություն արեցին. ՄԻՊ-ը չի կարողանում կոնկրետ հարցին կոնկրետ պատասխան տալ, ՄԻՊ-ը վախենում է մեղավորների անուններ հնչեցնել, բայց փոխարենը ՄԻՊ-ը տիրապետում է հայերենին և կարող է մայրենի լեզվով երկար ու անհեթեթ նախադասություններ շարադրել:
shame.am