Ընդամենը մի քանի օր առաջ, երբ լրագրողներն ԱԺ նախագահ Գալուստ Սահակյանի որդուց՝ Պետգույքի կառավարման վարչության պետ Արման Սահակյանից հետաքրքրվեցին, թե իրենք ինչ են օպտիմալացնելու իրենց գերատեսչությունում, սա ասաց. «Մեր գերատեսչությունում ընդամենը կա 4 ծառայողական մեքենա, որոնք սպասարկում են վարչության պետին՝ ինձ, 2 տեղակալներին և աշխատակազմի ղեկավարին»: Իսկ հետո կրտսեր Սահակյանը զոհաբերումի բացառիկ մղում հանդես բերեց՝ հայտարարելով, որ եթե հանուն հայրենիքի պետք է, որ ինքը ոտքով շրջի, ապա պատրաստ է իր նոր Camry-ից հրաժարվել:

Ինչ խոսք, ոչ ոք Արման Սահակյանին չթողեց իր զույգ ոտքերի հույսին: Բայց նրա խոսքերը տպավորություն գործեցին, և գուցե այդ տպավորությունը մի քիչ էլ երկարակյաց լիներ, եթե այսօր չկատարվեր այն, ինչն անխուսափելիորեն պիտի կատարվեր: Հենց այսօր առավոտյան, բուհերի դիմորդների միասնական քննությունների առաջին օրը, մայրաքաղաքի թիվ 190 դպրոցի բակում իրենց դիմորդ երեխաներին սատարելու եկած ծնողների շարքում լրագրողները նկատեցին նաև Արման Սահակյանին: Պարզվեց, որ նրա աղջիկը նույնպես պատրաստվում է բժիշկ դառնալ և քննություն էր հանձնել կենսաբանություն առարկայից:

Բայց այն պահին, երբ երջանիկ հայրը հիացած խոսում էր իր խելացի երեխայի մասին, լրագրողները նկատեցին, որ դպրոցի հարակից տարածքում հաղթականորեն կայանել էր պետական գույքի կառավարման վարչության պետի ծառայողական ավտոմեքենան, հենց այն, որը Արմանը պատրաստ էր սիրահոժար հետ վերադարձնել, բայց հանկարծ հիշել էր, որ դա դեռ երկար պիտի ծառայի իր ընտանիքի անդամների սպասարկմանը և միանգամից հրաժարվել էր այդ խելահեղ մտքից, որովհետև Սահակյան գերդաստանի համար երկիրն ու պետությունը սկսվում և ավարտվում են իրենց տան պատերի ներսում և իրենց ավտոտնակների տանիքի տակ: Իսկ բյուջեն թող ուրիշները լցնեն: Գրում է shame-ը