Ազգային ժողովի ՀՀԿ խմբակցության ղեկավար Վահրամ Բաղդասարյանին շատ են զայրացնում խոսակցություններն այն մասին, որ հիմա հանրությունը պաշտոնյաներից պահանջում է կուտակած հարստությունն ուղղել բանակին:

Ընդհանրապես, տալ բառը նա չի սիրում, սիրում է վերցնել: «Բանակում ամեն ինչ բարձր մակարդակի վրա է, և բանակի գումարները ծառայում են իրենց նպատակին: Ես խնդրում եմ այս իրավիճակում որևէ փորձ չանել ազդել զինվորների և նրանց ընտանիքների հոգեբանության վրա:

Դրանից պետք է ձեռնպահ մնալ, մեր բանակը հաղթանակած բանակ է»,- անմիջապես արձագանքում է Բաղդասարյանը՝ ինքն էլ մի կարգին չհասկանալով, թե ինչ հարցի ինչ պատասխան է տալիս: Բայց երբ ՀՀԿ-ականին հիշեցնում են, որ Սերժ Սարգսյանն էլ հանրային խորհրդի անդամների հետ հանդիպման ժամանակ հայտարարել է, թե ինքն էլ է զզվում այդ դղյակներից, բայց ի՞նչ կարող է անել, հո 1937 թիվը չէ, որ մարդկանց ունեցվածքը խլեն, այդ ժամանակ արդեն Վահրամ Բաղդասարյանը վերջնականապես է կորցնում իրեն:

«Ի՞նչ եք կարծում, այսինքն՝ մենք արդեն սկսենք ներքին քաղաքացիական պատերազմ մղել կամ սկսենք մերոնց կուլակաթափ անե՞լ ու դատարկե՞նք Հայաստանը: Դա եք ցանկանո՞ւմ»,- ահաբեկված բացականչում է նա:

 Բաղդասարյան Վահրամը գողերից գողոնը ետ վերադարձնելու գործընթացը համարում է արտագաղթելու հիմնավոր պատճառ:

Փաստորեն, նա պնդում է, որ եթե հանցագործներին սկսեն պատժել, Հայաստանն անմիջապես կդատարկվի: Երևի ինքն էլ արդեն ճամպրուկները կապել, շարել է դռան մոտ ու հետևում է, թե երբ վրա կհասնի ճակատագրական պահը:

Իսկ ահա այն, որ մինչ այդ տարիներ շարունակ իշխանություններն ու տարատեսակ պաշտոնյաներն էին «կուլակաթափ» անում ժողովրդին, որ այդ գրպանահատներից զզված հազարավոր մարդիկ բռնեցին գաղթի ճանապարհը, ՀՀԿ-ական պատգամավորը դա ոչ տեսել է, ոչ էլ վրդովվել է այդ երևույթից:

Ու հիմա, հարցից անակնկալի եկած` վրա է տալիս. «Համբերեք, համբերեք: Կա՞ աշխարհում մի անկյուն, որտեղ չլինեն հարուստներ և աղքատներ: Նման իրավիճակում նման հարցերի բարձրացումը ներքաղաքական կյանքում ավելի մեծ բարդություն է ստեղծում, ձեռնպահ մնացեք այդ հարցերի բարձրացումից ընդհանրապես: Ժամանակը կգա, ամեն ինչ կտեսնեք»:

Ժամանակն իրոք կգա: Իրոք որոշ բաներ կտեսնենք: Բայց եթե այդ ժամանակ Վահրամ Բաղդասարյանը ցանկանա առնել դռան մոտի ճամպրուկներն ու թռնել երկրից, այդ բանը նրան հազիվ թե հաջողվի: Ժողովուրդը թույլ չի տա, որ Բաղդասարյանը արտագաղթի: Նրան կպահեն: Ուժով կպահեն:

shame.am