«Բարգավաճ Հայաստան» խմբակցության պատգամավոր Լյովա Խաչատրյանն այսօր մամուլի ասուլիսին, անդրադառնալով նախկին ԲՀԿ-ականների կուսակցություններ ստեղծելուն, ասաց. «Բարգավաճի արգանդը բեղուն է և կարող է ծնել շատ կուսակցություններ»: Նա նշեց, որ որքան էլ կուսակցություններ ծնվեն, ԲՀԿ-ի հիմքը մնալու է: «Բեղուն արգանդը միշտ էլ ծնում է նորերը, ես ողջունում եմ»,-ասաց նա:

Մանկաբարձական գիտելիքներով օժտված Խաչատրյանը, հավանաբար, չի հասկանում, որ եթե բազմազավակությունը լավ է սովորական կյանքում և նպաստում է ազգի դեմոգրաֆիկ աճին, ապա քաղաքականության մեջ դա ոչ միայն մեծ վնասներ է պատճառում, այլև վկայում է այդ կուսակցության անդամների անսկզբունքայնության ու փոփոխամտության մասին, քանի որ կուսակցություն ասվածը նախևառաջ ենթադրում է գաղափար ու համոզմունք, և եթե երեկ մի գաղափարի շուրջ համախմբվածներն այսօր կարող են հեշտությամբ տրոհվել ու դառնալ այլ գաղափարների կրիչներ, ուրեմն կամ գաղափարը գաղափարի նման չէ, կամ մարդիկ են անհուսալի և կամազուրկ:

Մյուս կողմից էլ Լյովա Խաչատրյանն ինքնախոստովանությամբ է հանդես եկել՝ հաստատելով այն, ինչը շատ անգամներ մերժում էին հենց իրենք: Խոսելով ներկա բազմերանգ ու տարաբևեռ հասարակական խմբերի մասին, նա շատ դիպուկ որակում է տվել՝ ներկա քաղաքական դաշտն անվանելով խամաճիկների տարածք:

Այսինքն, ԲՀԿ-ական պատգամավորը չի ժխտում, որ իրենց լայնածիր արգանդից դուրս եկածները նույնպես խամաճիկներ են ու կառավարվում են մեկ կենտրոնից: Մնացածի մասին արդեն կարելի է չասել: Գրեթե բոլորն էլ հասկանում են, թե ով է այդ նորածինների տատմերը:

shame.am