ՀՀ արտգործնախարարությունն անօգուտ, վնասաբեր կառույց է, որի անդամների ուղեւորությունները չափազանց թանկ են նստում մեր ժողովրդի վրա, մինչդեռ ամբողջ նախարարությունը չարժի այդ թռիչքների վրա ծախսվող հազարավոր դոլարներին:

Այս մասին` մայիսի 2-ին, Newspress.am-ի հետ զրույցում ասաց տնտեսագետ Զոյա Թադեւոսյանը՝ նշելով, որ հատկապես պատերազմական իրավիճակում, երբ բանակին ուղղվող գումարների խիստ անհրաժեշտություն է նկատվում, որոշ պաշտոնյաներ միեւնույն է շարունակում են մսխել պետական բյուջեն:

«Նրանց բոլոր տիպի ուղեւորություններն էլ ժողովրդի վրա չափազանց թանկ են նստում: Այդ միջոցները բանակից, ժողովրդից, տնտեսության զարգացումից դուրս են հանում եւ տալիս գերհարստանալու այն մարդկանց, որոնք այդ միջոցներն ուղղակի մսխում են տարբեր կազինոներում ու տարբեր ուղեւորությունների վրա: Մեր երկրի ամենամեծ դժբախտությունն այն է, որ որոշում կայացնողներն ամոթ չունեն: Ցավոք, անամոթությունը դարձել է քաղաքական գործչի կարեւոր բնութագիր»,- ասաց Զոյա Թադեւոսյանը:

Թադեւոսյանն անդրադարձավ պետբյուջեի գումարների մսխման այլ դեպքերի եւս, մասնավորապես Կառավարության այն որոշմանը, որով նախատեսվում է պետական ծառայողներին պետբյուջեի հաշվին բնակարաններ հատկացնել:

«Այն բնակարանները, որոնք տրվում են այս իշխանությունների տարբեր ներկայացուցիչների, պետական բյուջեից, միջազգային վարկերից գողացված փողերով կառուցված տներ են: Քանի որ ներսում այդքան թանկարժեք բնակարանների պահանջարկ չկա, դրանք ինչ-որ ձեւով պետք է վաճառե՞ն: Իսկ վաճառելու ձեւերից մեկն էլ պետական միջոցներից գումարներ հատկացնելն է. իրենք իրենց գրպանն են դնում փողերը, իսկ մարդկանց էլ բնակարան են տալիս»,- նշեց Զոյա Թադեւոսյանը:

Նշենք, որ ըստ Կառավարության կայքի՝ մարտի 27-30-ը Երեւան-Փարիզ-Ժնեւ-Լոնդոն-Վաշինգտոն չվերթի 2 ավիատոմսի համար ԱԳՆ-ն վճարել է մոտ 10.000 դոլար: