ՀՀԿ-ի Մարգոն՝ պատգամավոր Մարգարիտ Եսայանը միֆաթափ է եղել: Հիմա կհարցնեք՝ դա ի՞նչ բան է: Ճիշտ կլիներ, եթե Մարգոյից հարցնեիք, բայց քանի որ դա դժվար է, մենք ասենք: Մարգոն իրեն ազատել է մի քանի միֆերից:

Պարզվում է՝ տիկինը երկար ժամանակ դրանց ազդեցության տակ է եղել, բայց հենց պատերազմը սկսվել է, միֆերը որոտների ձայներից փշրվել ու թափվել են, ու հիմա Եսայան Մարգոն վերջապես գիտի այն, ինչ դպրոցական երեխան էլ մինչ այդ անգիր գիտեր: Ուղղակի պատգամավորուհին մի փոքր այլ բառեր է օգտագործում: Մի մասը թռցրել է նախագահի ելույթներից, մի մասը խորհրդարանի միջանցքներում է լսել ու հենց այդ բառակույտերի շիլաշփոթն էլ կազմում են նրա վերջին ելույթի հիմնաքարը՝ նվիրված միֆերի տեսությանը:

Ըստ ՀՀԿ-ի Մարգոյի` հայ ժողովուրդը մինչև ապրիլի 2-ը սնվում էր այն պատրանքներով, թե մեծ վտանգի ժամին քաղաքական հակառակորդները հաշտվել չեն կարող, որ ժողովուրդն այլևս ոտքի չի կանգնի Ղարաբաղի համար, որ ներքին հակասությունները անհրաժեշտ պահին կխաթարեն պետության միասնությունը:

Ու հիմա պատգամավորը ուրախ է, որ պատերազմ եղավ, քանի որ հակառակ դեպքում նա չէր իմանա դրանց պատասխանը: «Քառօրյա պատերազմը նաև դրական ազդեցություն ունեցավ՝ մենք արթնացանք ընդարմացումից ու դարձանք միասնական բռունցք: Համերաշխությունը, հանդուրժողականությունը, չհասկացվածության պատերի քանդումը, որոնց մասին իր պաշտոնավարման առաջին օրերից խոսում է Հայաստանի նախագահը, այս օրերին ավելի տեսանելի եւ շոշափելի դարձան։ Ժողովուրդը դարձավ մեկ ազգ՝ մեկ զինվոր, երբ չկար իշխանություն ու ընդդիմության, ես ու դու, իմ ու քո»,- ասում է նա:

Չէինք ցանկանա սառը ջուր լցնել Մարգո Եսայանի ոգևորության վրա, միայն թե այլ տարբերակ չկա: Բանն այն է, որ այս քարոզչական ելույթի հեղինակի համար միշտ էլ լինելու է «իմ ու քո» սահմանաբաժանումը: Բայց ամենացավալին դա էլ չէ, այլ այն, որ Մարգոն չի հասկացել գլխավորը: Եվ այդ մեկը նրա համար իսկապես միֆ է մնալու: Չի հասկացել, որ իշխանությունն այլ բան է, երկիրը՝ այլ: Ու սեփական հողը պաշտպանելու համար ժողովուրդը կարիք չունի, որ իշխանությունը հրահանգ տա, տիկին Մարգոն էլ իր քվեարկությամբ դրան օրենքի ուժ հաղորդի:

Այդ ժողովուրդը եղել է Մարգոյից առաջ ու կլինի նրանից հետո: Եվ կլինի առանց Եսայանի նորագույն տեսության, որտեղ հորինովի միֆերի մտացածին բացառումը դեռ չի նշանակում, թե չկա այն իրականությունը, որտեղ Մարգոն դեռ արժեք է ներկայացնում:

shame.am