Գագիկ Ծառուկյանն իսկապես մեծ բարեգործ է: Օրինակ, երեկ նա Հրազդանի քաղաքապետ, կարիքավոր Արամ Դանիելյանի համար մեծ բարեգործություն արեց: Ծառուկյանն իր ավտոբուսներով տասնյակ կողմնակի անձանց բերեց՝ նրա օգտին քվեարկելու համար: Ծառուկյանն այդպես վարվեց, քանի որ հայտարարել էր՝ ինքը քաղաքականությունից դուրս է եկել, հիմա միայն մարդասիրական ակցիաներ է կազմակերպելու:

Երեկ Հրազդանում էր նաև նախկին ԿԳ նախարար Արմեն Աշոտյանը: Ասում են, որ նա իրեն հիմա շատ համեստ էր պահում, Ծառուկյանի հասցեին «Դոդ, Դոդ…» չէր գոռում, որովհետև երբ անցյալ տարվա ամռանը Աշոտյանին Բաղրամյան պողոտայում երիտասարդները «Սիկտիր, սիկտիր» ասացին, Աշոտյան-Ծառուկյան հաշիվը դարձավ ոչ-ոքի:

Եվ ահա հենց այդ համեստ Աշոտյանին էլ լրագրողները որոշեցին հարցրնել, թե ի՞նչ կարող է ասել այն մասին, որ տարբեր քաղաքներից, մասնավորապես, Աբովյանից և Արտաշատից Ծառուկյանին պատկանող ավտոբուսներով քաղաքացիներ են բերվել Հրազդան: Նախկին նախարարն ու ՀՀԿ փոխնախագահն էլ պատասխանեց, որ ՀՀ քաղաքացիներն ազատ տեղաշարժվելու իրավունք ունեն ու կարող են այցելել ցանկացած քաղաք, ցանկացած պահի, ցանկացած փոխադրամիջոցով՝ դա կլինի Գագիկ Ծառուկյանին պատկանող ավտոբուս, թե այլ մեքենա։

«Ինձ մոտ հարց է առաջանում՝ ինչու լրատվամիջոցները այլ դեպքերին չեն անդրադառնում, այլ անդրադառնում են այսօր տարածված տեսանյութերի ավտոբուսներին»,- նույնիսկ զարմացավ Աշոտյանը:

Իսկապես, էլի, ի՞նչ կարիք կար դա տեսնելու: Գիտե՞ք, թե Աշոտյանը քանի տարի է կույր եղել և նրա հետ ոչինչ չի պատահել: Երբ տարիներ շարունակ Երևանում անցկացվող միտինգների ու ցույցերի ժամանակ ամբողջ հանրապետությունը վերածվում էր պաշարված բերդի, ճանապարհները փակվում էին ոստիկանների կողմից, գծերից դուրս էին բերվում միջքաղաքային երթուղային տրանսպորտը, արգելվու էր տաքսիների աշխատանքը, դրանցից ո՞ր մեկի դեպքում է Աշոտյանը խոսել մարդկանց ազատ տեղաշարժման իրավունքի մասին: Այդպես է պետք եղել՝ այդպես են արել: Իսկ Աշոտյանը...

Դե մարդը դեմագոգ է, հո զոռով չէ՞: Ի՞նչ եք պահանջում նրանից: Ու եթե հիմա ինքն ուզում է լինել ավելի վատը, քան կա, ապա դրա համար մեծ ջանքեր գործադրելու անհրաժեշտություն հազիվ թե լինի, որովհետև Արմեն Աշոտյանն արդեն վատի ամենավերջում է` Ծառուկյանի մերձակայքում:

shame.am