Հայի թուրք տեսակն այսօր կրկին հիշեցրեց իր մասին. բերան ջարդող, գլուխ փշրող, թիվ խփող, նկարող իգիթներն ո՞ւր էին օրեր առաջ: Ընտրատեղամասեր «ջոկատներ» բերող դեղին պազիկներով դրանց թուրքի գյուլլի բերանն էր պետք քշել, թե՞ իրենց հատուկ բուծում են` տեղամասերում մեկօրյա ահ ու սարսափ տարածելու համար...

Մի քանի օր առաջ փորձեցինք հավատալ, որ դասեր կքաղենք ապագայի համար ու հանուն նահատակների հիշատակի` ավելի զգոն ու ներող կդառնանք, բայց ոչ, մեր հաշվարկներում նորից սխալվեցինք:
Մեզ վարժեցրել են ստին, կեղծիքին, քծնանքին, մեր պայքարում` ձախողելուն, ոչընտիրներին` հարմարվելուն.....

Ամենքս, մեր մեղքի չափաբաժինը գիտակցելով, նորից ու նորից թույլ ենք տալիս, որ ներսի խուժանն ավելի ամրանա, հաստատուն արմատներ ձգի, քայքայի շուրջը եղած մաքուրը, պարարտը:
Ընտրատեղամասն առաջնագիծ չէ, այնտեղ «Սմերչ»-ով, «ՏՈՍ»-ով կամ «Իսկանդեր»-ով չեն վախեցնի, ավելին` անօդաչուների վտանգն էլ չկա և թվում է` ուժեղ ես, պաշտպանված ու ամուր, որովհետև շուրջ բոլորդ քո հայրենակիցներն են` ինքնակոչ իշխանություններից ջլատված, նույն իշխանություններին` գերի:
Իրենցն ես, քանի դեռ չես բարձրաձայնել կեղծիքների մասին, իսկ երբ ըմբոստանում ես, միանգամից հայտնվում ես ականապատ դաշտում, հանձնաժողովի իշխանական ռադարներն ուղղվում են հակառակորդ դիտարկվող օբյեկտի ուղղությամբ, որին առանց երկմտելու կոչնչացնեն` հանուն իրենց տերերի, նրանց շպրտած գրոշների ու թուլափայի:

Ազգս` յուրայինների ու թշնամիների բաժանած ինքնակոչն էլի շարունակելու է բուծել նորանոր խուժանների, զինել նրանց ամենաթարմ կեղտոտ մեթոդներով ու սպառնալիքներով, որ հարկ եղած դեպքում սարսափի մեջ պահեն հայի պայքարող ու ըմբոստ տեսակին, որը չկոտրվեց, չկեղտոտվեց, կուլ չգնաց:
Հայի ազնիվ տեսակն անպարտելի է, նրանք չեն սպանում, չեն գնդակահարում, չեն թալանում, նրանց պայքարը սահմանին է, որտեղ կամակատար խուժանը ոչ մի գնով համարձակություն չի ունենա հասնելու:
Թշնամու գնդակներին դեմհանդիման դուրս գալ չեն կարող, հակառակորդին ասելիք չունեն, իրենց կռիվը ներսում է` պատերի տակ, տերերի հրամանով, նույն հայի դեմ:
Հայի իսկական թշնամին իր մասին այսօր նորից հիշեցնել տվեց. մեր ներսում կրակեց ամենաանվնաս ու ամենադաժան զենքը` գրիչը, այն կրկին թվեր նկարեց....

Լուսինե Խաչատրյան