«Նուբարաշենում» Համլետին դրդում են ինքնասպանության.

Արդարադատության նախարար Արփինե Հովհաննիսյանը չի տիրապետում ՔԿ հիմնարկներում տիրող իրավիճակին:
Ամիսներ շարունակ մենք ահազանգում ենք տարբեր ՔԿՀ-ների վարչախմբերի կողմից՝ «զբոսաշրջիկ« Համլետ Ղազարյանի նկատմամբ դրսևորվող ճնշումների մասին: Օրեր առաջ մեր հնչեցրած ահազանգից հետո, «Նուբարաշեն» ՔԿՀ-ի հացադուլավորների խցից կարանտինային խուց տեղափոխված դատապարտյալին են այցելել հիմնարկի բժիշկը, հետաքրքրվել նրա առողջական վիճակից, այնուհետև տարել են ՔԿՀ-ի պետի սենյակ և հետաքրքրվել, թե ում դեմ է իր բողոքը: 

Հ. Ղազարյանը պատասխանել է՝ ադմինիստրացիայի, քանի որ իրեն բուժօգնություն չեն ցուցաբերում, որովայնում գտնվող ասեղները հանելու համար չեն տեղափոխում քաղաքացիական կամ գոնե դատապարտյալների հիվանդանոց: Բողոքները՝ ուղղված արդարադատության նախարարին և գլխավոր դատախազին, չեն հասնում հասցեատերերին:

Դա առիթ է դարձել, որ ՔԿՀ-ի վարչախումբը պետի սենյակում կրկին նվաստացնի և ճնշի դատապարտյալին: Նրանք ասել են, որ եթե բողոքն իրենց դեմ է, ուրեմն ոչ մի օգնություն էլ չեն ցուցաբերի, նույնիսկ կարող են նրան տեղափոխել 00 «կամեր», որտեղ չի ուզում հայտնվել ոչ մի կալանավոր կամ դատապարտյալ:Այժմ Համլետ Ղազարյանի հարազատները ահազանգում են, որ նա ուզում է դիմել ինքնասպանության:

Եթե այսքան ահազանգերից հետո որևէ բան չի փոխվում ՔԿՀ-ներում, ուրեմն Արփինե Հովհաննիսյանը չի տիրապետում իրավիճակին. խորհրդային ժամանակներից ՔԿ վարչությունում հավաքված տիղմ կա, որը մասնագիտացել է բողոքողներին «վնասազերծելով»: 

Դա այն աստիճանի է հասել, որ քրեական աշխարհի ներկայացուցիչները, որոնց համար նախկինում ընդունված չէր բողոքելը, այժմ տարբեր ձևերով իրենց բողոքը հասցնում են լրատվամիջոցներին:

Հիշեցնենք, որ վերջին ամիսներին հաճախակիացել են դատապարտյալների, կալանավորների առեղծվածային մահվան դեպքերը, այդ թվում նորակառույց և եվրոպական չափանիշներին համապատասխան «Արմավիր» ՔԿՀ-ում: