Ժողովրդի ամբողջ ուշադրությունը սևեռված է ռազմական գործողությունների թատերաբեմի վրա: Այս պահին ցանկացած այլ իրադարձություն և դեպք պիտի որ ստորադասվի գլխավորին: Բայց ահա, պարզվում է, կան մարդիկ, ովքեր հրաշալի հասկանալով դա, որոշել են օգտվել առիթից և գլուխ բերել իրենց նյութապաշտ մտադրությունները:

Այսօր մայրաքաղաքի բնակիչները զարմանքով նկատեցին, որ քաղաքի հենց կենտրոնում, Հանրապետության հրապարակին հարակից` Վազգեն Սարգսյան փողոցի միջանկյալ պուրակում, «Էրեբունի-Երևան 2750» շատրվանային համալիրի շուրջ մետաղյա կոնստրուկցաներ են տեղադրվել: Ակնհայտ է, որ քաղաքապետարանը դարձյալ տարածք է տրամադրել ինչ-որ մեկին՝ նոր սրճարան կամ այլ կարգի զվարճավայր բացելու համար:

Զբոսայգին հանրային հանգստի տարածք է, իսկ ցայտաղբյուրները վաղուց են ձեռք բերել մեր քաղաքի տեսարժան վայրերից մեկը լինելու և հուշարձան համարվելու իրավունքը: Սակայն Տարոն Մարգարյանին և քաղաքի համար պատասխանատու մյուս չինովնիկներին արդեն նման հարցերը չեն անհանգստացնում: Երևանը քայլ առ քայլ նվաճվում է, ավերիչներն իրենց ճանապարհին ոչնչացնում են յուրաքանչյուր արժեքավոր բան:

Եվ հիմա հասկանալի է այն մարդկանց վրդովմունքը, ովքեր սոցիալական ցանցերում այսպիսի գրառումներ կատարում «Մինչ տղերքը սահմանին արյուն են թափում, մինչ ողջ հասարակությունը ոտքի է կանգնել ու համախմբվում է արժեքների շուրջ, որոնք, թվում էր, թե մոռացվել էին ու էլ չկան, Երևանի քաղաքապետարանում ոչինչ չի փոխվում ու նրանց մոտ ամեն ինչ առաջվա պես է․ ծախում են երկիրը, աղավաղում են մշակութային արժեքները, ամեն ինչ շուկա են դարձնում։

Պարոն Տարոն, այս շատրվանները կառուցվել են դեռ այն ժամանակ, երբ դուք փոքր երեխա էիք։ Հիշո՞ւմ եք, թե ինչ գեղեցիկ էին դրանք, ինչ հաճելի կոլորիտ էին հաղորդում քաղաքին ու նամանավանդ ամռանը, երբ կիզիչ ճառագայթները ասես այրում են քեզ, միշտ հաճելի էր զբոսնել այդ կանաչ կածանով… Կանգնեցրե՛ք այս խայտառակությունը, հարգեք մեր ու Ձեր քաղաքը, հարգեք այս երկիրն ու այս ժողովրդին»։

Հարգանքի մասին Տարոն Մարգարյանին հիշեցնելն անիմաստ է: Քաղաքապետը միայն մի դեպքում է սթափվում, երբ առավել ազդեցիկ մեկը նրա ականջի տակ շշնջում է. «Սիրուն չի, Տարոն»: Ու հիմա էլ կարծես թե ստիպված պիտի լինենք զինվել համբերությամբ ու սպասել այդ շշուկին:

shame.am