Հիշո՞ւմ եք ժողովրդական հայտնի խոսքը՝ «Մուկը ծակը չի մտնում, ցախավելն էլ պոչից է կապել»: Հիմա ճիշտ այդ վիճակում է Դաշնակցությունը: Բոլոր միջոցները գործադրելուց և վերջապես իշխանական տարածք խցկվելուց հետո ՀՅԴ-ն այժմ փորձում է այն տպավորությունը գործել, թե ներսում դաշնակցականները մի քիչ ավելին են, քան ընդամենը մի քանի պորտֆելների տերեր: Ու քանի որ իրականում ավել բան չունեն, այդ պատճառով էլ որոշել են ներսում տեղավորել մի ամբողջ հայկական սփյուռք:

Վերջերս ՀՅԴ բյուրոյի անդամ Մուրադ Փափազյանը մամուլին տված հարցազրույցում ուղղակի հայտարարել է, թե ՀՅԴ-ի իշխանական կոալիցիա մտնելով՝ սփյուռքը մտել է ՀՀ կառավարություն: Այս անհեթեթ արտահայտությունն անմիջապես հարուցել է բազմաթիվ սփյուռքահայերի զայրույթը: Մարդիկ նախ ուզում են հասկանալ, թե ինչպես կարելի է այդպիսի հիմարություն ասել: Իսկ դրանից հետո նրանք հարկ են համարում բացատրել, որ ՀՅԴ-ն դեռ սփյուռք չէ, և սփյուռքն էլ ՀՅԴ չէ թեկուզ այն պարզ պատճառով, որ իրականում սփյուռքը շատ ավելի բազմազան, տարողունակ և խայտաբղետ երևույթ է, էլ չենք խոսում այն մասին, որ այդ սփյուռքի հազարավոր անդամներ ընդհանրապես կապ չունեն որևէ քաղաքական ուժի հետ:

Ցավոք, Փափազյանի խոսքերում այն կեղծ մտայնության նստվածքն է, որով վարակված են դաշնակցականներից շատերը և նույնը ցանկանում են ներշնչել հայաստանցիներին: Բազմաթիվ անգամներ առիթ է եղել ՀՅԴ-ականների շուրթերից լսելու, թե սփյուռքը գտնվում է իրենց տնօրինության տակ և իրենք են դրսում գտնվող հայերի՝ Հայրենիքի հանդեպ տրամադրությունները ձևավորում: Միայն այս ձևով դաշնակները կարող էին պահպանել իրենց հեղինակության վերջին բեկորները և միայն նման կեղծիքների շահարկմամբ կարող էին նեղ ճեղքերից մուտք գործել իշխանություն:

Այժմ սփյուռքը հակադարձում է: Այդ արձագանքը վաղը կարող է դառնալ ոչ միայն բանավիճային, այլև շատ առարկայական: Ապացուցելու համար, որ իրենք ՀՅԴ չեն, բազմաթիվ սփյուռքահայեր պարզապես կարող են մասնակից չդառնալ այն ձեռնարկներին, որոնք ուղղված են Հայաստանին աջակցելուն: Եվ այս դեպքում դրսի հայերը ճշմարիտ բացատրություն կունենան: Նրանք կասեն. «Մենք օժանդակում ենք մեր երկրին, այլ ոչ թե Դաշնակցությանը»:

shame.am