Հրազդանում նախընտրական քարոզարշավը կսկսվի մարտի 30-ին, կավարտվի ապրիլի 15-ին:

Օրեր առաջ ՔՊ կուսակցության անդամ, քաղաքապետի թեկնածու Սասուն Միքայելյանը մեզ հետ զրույցում նշեց, որ ֆեյսբուքով իր նյութին մարզպետարանի մի աշխատակից հավանություն էր տվել, կանչել էին նկատողություն արել: Ըստ ամենայնի` իշխանությունները այնքան են ցայտոտնի մեջ հայտնվել Հրազդանում ստեղծված իրավիճակով, որ սկսել են ճնշումներ գործադրել անգամ «լայքերի» պատճառով:

Նույն խնդրի մասին իր ֆեսբուքյան էջում գրում է քաղաքապետի մյուս թեկնածու Արթուր Միսակյանը. «Սովորաբար չեմ սիրում բողոքել, այլ նախընտրում եմ պայքարել ու այդպես էլ անում եմ:

Հրազդանի քաղաքապետի ընտրություններում առաջադրվելու մասին հայտարարելուց հետո, տոտալ ճնշումներ են սկսվել ընկերներիս, բարեկամներիս, թիմակիցներիս և բոլոր այն մարդկանց նկատմամբ, ովքեր այս օրերին ինձ հետ աշխատում են:

Մեկին համոզում են, մեկին փորձում են կաշառել, մեկին` վախեցնել: Ասել եմ ու կասեմ՝ եթե կարող եք ինձ հետ ազնիվ ու արդար ձևերով պայքարեք, հակառակ դեպքում, խոստանում եմ, հակահարվածը շատ ցավոտ է լինելու:

Էսօր մի ժպիտ առաջացնող բան պարզեցի՝ իմ ֆեյսբուքյան մի շարք ընկերներ ինձ հեռացրել են իրենց ընկերների ցանկից՝ պայմանավորված իմ՝ Հրազդանի քաղաքապետի թեկնածու առաջադրվելու հանգամանքով: Պարզվում է` տեղական իշխանությունները նույնիսկ հետևում են, թե ով ում հետ է սոցիալական ցանցերում ընկերություն անում, լայք դնում և այլն:

Պետական հաստատություններում աշխատող բազմաթիվ մարդիկ հայտնվել են վատ վիճակում: Հասկանում եմ նրանց, միևնույն ժամանակ վստահ լինելով, որ նույն այդ մարդիկ չեն քվեարկելու նախընտրական շրջանում իրենց տեռորի ենթարկողների օգտին: Դեռ համբերատար սպասում եմ:
Այս պահին զբաղված եմ քարոզարշավի կազմակերպչական հարցերով: Բայց որոշ մարդիկ մոռանում են, որ առջևում քարոզարշավ կա: Ամեն բան կասվի ճիշտ ժամանակին: Ոմանց համար ահավոր տխուր է լինելու...»:

Սա ֆեյսբուքյան մասով: Իսկ ֆեյսբուքից դուրս, ահա, թե ինչ է կատարվում Հրազդանում: Մինչ Սասուն Միքայելյանի թիմը աշխատում է ճշտել, թե քաղաքում քանի ընտրող կա, Արամ Դանիելյանի շտաբում զանգում են քաղաքացիներին, հարցնում` ում եք ընտրելու եւ ցուցակներ կազմում, թե ինչի համար` պարզ կլինի առաջիկայում:

Նելլի Կարապետյան

Նյութի աղբյուրը ` hraparak.am