Հանրապետական կուսակցությունը սկսել է լուրջ վտանգ զգալ Հրազդան քաղաքում ստեղծված նախընտրական զարգացումներից: Գործող քաղաքապետ, ՀՀԿ-ական Արամ Դանիելյանի «ապագայի» համար խիստ մտահոգ ՀՀԿ-ն Հրազդանում ընտրությունների պատասխանատու է կարգել Կրթության եւ գիտության նախկին նախարար, այժմ իրեն լրագրությանն, երգարվեստին ու ՀՀԿ-ին նվիրած Արմեն Աշոտյանին:

Պարզից էլ պարզ է, որ խնդիրը ոչ այնքան Արամ Դանիելյանն, որքան «Քաղաքացիական պայմանագիր» կուսակցության թեկնածու Սասուն Միքայելյանի շտաբի պետ ԱԺ պատգամավոր Նիկոլ Փաշինյանին «ջախջախելը»:

Բանն այն է, որ Նիկոլ Փաշինյանը իշխանությունների համար «դիսկոմֆորտ» է ստեղծել Հրազդանում, այցելել է դպրոցներ` գործող քաղաքապետի օգտին ցուցակներ կազմելու ահազանգի հետքերով, այդ խնդրով դիմել է ԿԳ նախարար Լեւոն Մկրտչյանին, ով խոստացել է պատժել օրինախախտ տնօրեններին:

Արամ Դանիելյանի թիմն էլ տեսանկարահանել է Սասուն Միքայելյանի շտաբի ղեկավարի այցելությունները դպրոցները, հայտարարություն տարածել, թե վերջինս ճնշումներ է գործադրում տնօրենների վրա: Ավելին այդ խնդրով նա դիմել է Գլխավոր դատախազություն: Իրեն գաղտնի հետեւելու եւ տեսանկարահանելու համար էլ Նիկոլ Փաշինյանը դիմել է ԱԱԾ պետ Գեորգի Կուտոյանին: Մի խոսքով` քարոզարշավը նոր է սկսվում, սպասենք կինոյի հաջորդ սերիաներին, այս անգամ նաեւ` Աշոտյանի մասնակցությամբ:

Հիշեցնենք, որ ապրիլի 17-ին Հրազդանում կայանալիք ՏԻՄ ընտրություններին քաղաքապետի պաշտոնի համար կպայքարեն Արամ Դանիելյանը, Սասուն Միքայելյանը եւ «Հայկական վերածնունդից» Արթուր Բաղդասարյանի նախկին խոսնակ Արթուր Միսակյանը:

Նյութի աղբյուրը ` hraparak.am