Հայաստանում վերջին օրերին երկու սկանդալ բռնկվեց կապված ՀՀԿ փառապանծ պատգամավոր Սամվել Ալեքսանյանի հետ: Նախ, նա խոստովանեց, որ կեղծում է ուկրաինական օղիները, իսկ երկրորդ սկանդալը կապված էր Ախուրյանի շաքարի գործարանի հետ:

Նիկոլ Փաշինյանը խորհրդարանում հրապարակեց պաշտոնական փաստաթղթեր, ըստ որոնց ստացվում է, որ հումքի անվան տակ Սամվել Ալեքսանյանին պատկանող ընկերությունը շաքարավազ է ներկրում, այդպիսով խուսափելով համապատասխան գանձումներից: Այդ սկանդալից բաժին հասավ նաեւ Սերժ Սարգսյանին, Նիկոլը կասկած հայտնեց ճակնդեղագործության հարցում նրա կոմպետենտության վերաբերյալ, որն էլ իր հերթին դարձավ Շմայսի ու Կարեն Ավագյանի հետ միջադեպի պատճառը:

Սամվել Ալեքսանյանն այս մեկը չխոստովանեց, փոխարենը Նիկոլ Փաշինյանի այդ բացահայտումը վերագրեց նախընտրական տրամաբանությանը, հայտարարելով, որ «Նիկոլը մեր ախպերն ա»:

Սակայն, սա նույնպես ինքնին խոստովանություն է, քանի որ Հայաստանում պաշտոնյաների շրջանում ընդունված է, որ երբ չեն կարողանում հակափաստարկներ ներկայացնել, ընկնում են ճակնդեղի դաշտերը:

Այսպիսով, կա հանցագործության երկու աղաղակող հայտարարություն ՀՀ Ազգային ժողովի պատգամավորի վերաբերյալ, որոնք ՀՀ իրավապահները պարտավոր են ուսումնասիրել: Առավել եւս, որ գործ ունենք մի իրավիճակի հետ, երբ Հայաստանը ստանձնել է կոռուպցիայի դեմ պայքարի հանձնառություն, որով էլ պայմանավորված են արտաքին տնտեսական աջակցությունը եւ ներդրումները մեր երկրում:

Առավել եւս, որ ըստ արտաքին գործընկերների՝ Հայաստանում առկա է համակարգային, պետական մակարդակի կոռուպցիա:

lragir.am