Մեծ Բրիտանիայի վարչապետի հետ հանդիպումից հետո ելույթ ունենալով Լոնդոնի Արքայական միացյալ ծառայությունների հաստատությունում՝ Իրանի նախագահի աշխատակազմի ղեկավար Մոհամեդ Նահավանդյանը անկեղծ էր իր այցի պատճառների մասին:

«Միջուկային գործարքից հետո գոյություն ունի իրական հնարավորություն Իրանի հետ տնտեսական հարաբերությունների զարգացման համար: Եթե այն տեղի չունենա և նյութական արդյունքները չհաջորդեն դրան, վնասը ավելի քան ծանր կլինի», - ասել է Նահավանդյանը:

Միացյալ Նահանգները պահպանում է Թեհրանի դեմ այն պատժամիջոցները, որոնք չեն վերաբերում միջուկային ծրագրին: Նոր պատժամիջոցներ էին մտցվել անցյալ տարի Իրանի կողմից բալիստիկ հրթիռի փորձարկումից հետո:

Սակայն աշխատակազմի ղեկավար Նահավանդյանը մտավախություն ունի, որ միակողմանի պատժամիջոցները խոչընդոտում են ԱՄՆ-ից դուրս գտնվող բանկերի մուտքը Իրան:

«Ոչ-ամերիկյան բանկերը չպետք է որևէ կերպ սահմանափակվեն Իրանի բանկերի հետ համագործակցելուց», - ասել է նա:

Անցյալ ամիս անցկացված խորհրդարանական ընտրություններն ուժեղացրել են Իրանի նախագահ Հասան Ռուհանիի դիրքերը՝ դեպի Արևմուտք պատուհանը բացելու առումով:

Քննադատները պնդում են, որ Իրանում դեռևս լայնորեն տարածված են մարդու իրավունքների ոտնահարումները: Երկիր, որտեղ դեռեւս հարյուրավոր քաղաքական բանտարկյալներ կան, իսկ ընդդիմության գլխավոր ղեկավարները դեռևս տնային կալանքի տակ են:

Արքայական միացյալ ծառայությունների հաստատությունից Մալքոլմ Քհալմերսը կարծում է, որ բարեփոխումները Իրանում չափազանց դանդաղ են:

«Կա ակնհայտ ժողովրդական շարժում, հատկապես երիտասարդների շրջանում, որի կարծիքով պետք է ունենալ խորհրդարան ու փորձագետների խորհուրդ, որոնք արտահայտում են ժողովրդի կարծիքը և որոնք առաջնայնություն ունեն երկրի  գերագույն առաջնորդի նկատմամբ», - ասել է Մալքոլմ Քհալմերս

Նահավանդյանի ելույթը ներկայացնում է միայն Իրանի տեսակետները, սակայն դիտորդների կարծիքով, դա Իրանի կողմից Արևմուտքի հետ այլ ապագա կերտելու ջանքերի մասին է խոսում: