ԱԺ-ում բուռն քննարկման առարկա էր դարձել նոր՝ Ներքին գործերի նախարարության ստեղծման հարցը: Նախատեսվում է Ոստիկանությունն ու ԱԻՆ-ը, ինչպես նաև ևս մեկ գերատեսչություն մեկտեղել մեկ հարկի տակ մոտավորապես այն նույն մոդելով, ինչ՝ ԿԳՄՍՆ-ի դեպքում:

Ստեղծվելիք Ներքին գործերի նախարարությանը, որ արդեն իսկ հասցրել է վաստակել սուպերնախարարության համբավ, դեռևս չնայած վաղ է գնահատական տալ միանգամայն տեսանելի ու հասկանալի պատճառներով, սակայն դրա ստեղծումը բնականորեն արթնացնում է ակնկալիքներ, իսկ ոմանց մոտ էլ՝ պատճառաբանված մտավախություններ՝ նկատի ունենալով այն վատ վիճակը, որ կա այսօր Հայաստանի ուժային կառույցներում, այն՝ անցյալից ժառանգած արատավոր բարքերը, որ այդպես էլ հնարավոր չեղավ հաղթահարել:
Մասնավորապես՝ հնչում է մտավախություն, որ նախարարությունը կարող է դառնալ քաղաքական իշխանությունների ձեռքին ավելի կատարյալ գործիք՝ լուծելու նախևառաջ քաղաքական խնդիրներ: Ճիշտ է՝ այդ հարցում ներկայիս Ոստիկանությունն ինքն իրեն կարծես արդարացրել է իշխանությունների առաջ՝ շահագործվելով որպես մահակ՝ ընդդիմության գլխին, սակայն նոր նախարարության դեպքում իշխանություններին մատուցվող ծառայությունները կարող են է՛լ ավելի կատարելագործվել՝ էլ ավելի մեծացնելով նախևառաջ նրանց քաղաքական իմունիտետը, որի աղբյուրը վաղուց դադարել է լինել ժողովուրդը:
Մյուս կողմից՝ հարց է առաջանում՝ կապված այն հարցի հետ, թե օբյեկտիվորեն որքա՞ն դրական ազդեցություն կարող է թողնել սուպերնախարարության ստեղծումը ուժայինների բուն գործառույթների իրականացման որակի, կատարողականի վրա, եթե հաշվի ենք առնում ասենք այն՝ հանցագործությունների թվի աննախադեպ աճի վերաբերյալ պարբերաբար հրապարակվող ստատիստիկան, որը միայն լրջագույն հարցեր է առաջ բերում:
Այսպիսով՝ արդյոք ՆԳՆ-ի ստեղծումը որևիցե օգուտ կբերի՞ հանցագործությունների թվի աճի կանխարգելման հարցում կամ ասենք մատուցվող ծառայությունների որակի բարելավման:
Եվ վերջապես արդյոք ՆԳՆ-ի ստեղծմամբ հնարավոր կդառնա՞ «վովայականության» սինդրոմի հաղթահարումը, որ, ցավոք, ցայսօր այդպես էլ հաղթահարված չէ համակարգում:
Հնարավոր է ցանկացած բան, եթե լինի քաղաքական կամք: Հետևաբար՝ ամենակարևոր հարցը ոչ թե այն է, թե տեխնիկական առումով ՆԳՆ-ի ստեղծումն ինչ կարող է տալ կամ չտալ, այլ՝ այն, թե արդյոք կգտնվի՞ քաղաքական կամք՝ համակարգը խելքի բերելու, հանցագործության դեմ իրական պայքար մղելու, Ոստիկանություն-հասարակություն երկխոսությունը վերականգնելու ու զարգացնելու՝ մի բան, որ իշխանություններին շահավետ կարող է լինել հատկապես քաղաքական իմաստով՝ ինչ-որ կերպ նպաստելու իշխանության ու ժողովրդի միջև առաջացած անջրպետի վերացմանը: